८. अनुत्तरियसुत्तवण्णना

८. अट्ठमे नत्थि एतेसं उत्तरानि विसिट्ठानीति अनुत्तरानि, अनुत्तरानि एव अनुत्तरियानि यथा ‘‘अनन्तमेव अनन्तरिय’’न्ति आह ‘‘निरुत्तरानी’’ति. दस्सनानुत्तरियं नाम फलविसेसावहत्ता. एस नयो सेसेसुपि. सत्तविधअरियधनलाभोति सत्तविधसद्धादिलोकुत्तरधनलाभो. सिक्खात्तयस्स पूरणन्ति अधिसीलसिक्खादीनं तिस्सन्नं सिक्खानं पूरणं. तत्थ पूरणं निप्परियायतो असेक्खानं वसेन वेदितब्बं. कल्याणपुथुज्जनतो पट्ठाय हि सत्त सेखा तिस्सो सिक्खा पूरेन्ति नाम, अरहा परिपुण्णसिक्खोति. इति इमानि अनुत्तरियानि लोकियलोकुत्तरानि कथितानि.

अनुत्तरियसुत्तवण्णना निट्ठिता.