३. उग्गहसुत्तवण्णना

३३. ततिये सब्बपठमं उट्ठानसीलाति रत्तिया विभायनवेलाय सामिके परिजने सेय्याय अवुट्ठिते सब्बपठमं उट्ठानसीला. सामिकं दिस्वा निसिन्नासनतो अग्गिदड्ढा विय पठममेव वुट्ठहन्तीति वा पुब्बुट्ठायिनियो. किंकारन्ति किंकरणीयं, किंकरणभावेन पुच्छित्वा कातब्बवेय्यावच्चन्ति अत्थो. तं पटिस्सुणन्ता विचरन्तीति किंकारप्पटिस्साविनियो. मनापंयेव किरियं करोन्ति सीलेनाति मनापचारिनियो. पियमेव वदन्ति सीलेनाति पियवादिनियो.

तत्रुपायायाति तत्र कम्मे साधेतब्बउपायभूताय वीमंसाय. तेनाह ‘‘तस्मिं उण्णाकप्पाससंविधाने’’तिआदि. अलं कातुन्ति कातुं समत्था. अलं संविधातुन्ति विचारेतुं समत्था. तेनाह ‘‘अलं कातुं अलं संविधातुन्ति अत्तना कातुम्पि परेहि कारापेतुम्पी’’तिआदि. सेसमेत्थ सुविञ्ञेय्यमेव.

उग्गहसुत्तवण्णना निट्ठिता.