२. चुन्दीसुत्तवण्णना

३२. दुतिये ‘‘अरियकन्तेहि सीलेहि समन्नागतो’’तिआदीसु (अ. नि. ५.१७९) अरियकन्तानीति पञ्चसीलानि आगतानि. अरियकन्तानि हि पञ्चसीलानि अरियानं कन्तानि पियानि, भवन्तरगतापि अरिया तानि न विजहन्ति. इध पन ‘‘यावता, चुन्द, सीलानि अरियकन्तानि सीलानि, तेसं अग्गमक्खायति…पे… अग्गे ते परिपूरकारिनो’’ति वुत्तत्ता मग्गफलानि सीलानि अधिप्पेतानीति आह ‘‘अरियकन्तानि सीलानीति मग्गफलसम्पयुत्तानि सीलानी’’ति.

चुन्दीसुत्तवण्णना निट्ठिता.