३. कुहकसुत्तवण्णना

८३. ततिये तीहि कुहनवत्थूहीति सामन्तजप्पनइरियापथसन्निस्सितपच्चयप्पटिसेवनभेदतो तिप्पभेदेहि कुहनवत्थूहि. तिविधेन कुहनवत्थुना लोकं कुहयति विम्हापयति ‘‘अहो अच्छरियपुरिसो’’ति अत्तनि परेसं विम्हयं उप्पादेतीति कुहको. लाभसक्कारत्थिको हुत्वा लपति अत्तानं दायकं वा उक्खिपित्वा यथा सो किञ्चि ददाति, एवं उक्काचेत्वा कथेतीति लपको. निमित्तं सीलं तस्साति नेमित्तिको, निमित्तेन वा चरति, निमित्तं वा करोतीति नेमित्तिको. निमित्तन्ति च परेसं पच्चयदानसञ्ञुप्पादकं कायवचीकम्मं वुच्चति. निप्पेसो सीलमस्साति निप्पेसिको. निप्पिसतीति वा निप्पेसो, निप्पेसोयेव निप्पेसिको. निप्पेसोति च सठपुरिसो विय लाभसक्कारत्थं अक्कोसनुप्पण्डनपरपिट्ठिमंसिकतादि.

कुहकसुत्तवण्णना निट्ठिता.