६-७. पटिसम्भिदाप्पत्तसुत्तादिवण्णना

८६-८७. छट्ठे पटिसम्भिदासु यं वत्तब्बं, तं हेट्ठा वुत्तमेव. उच्चावचानीति उच्चनीचानि. तेनाह ‘‘महन्तखुद्दकानी’’ति. किंकरणीयानीति ‘‘किं करोमी’’ति एवं वत्वा कत्तब्बकम्मानि. तत्थ उच्चकम्मानि नाम चीवरस्स करणं, रजनं, चेतिये सुधाकम्मं, उपोसथागारचेतियघरबोधिघरेसु कत्तब्बकम्मन्ति एवमादि. अवचकम्मं नाम पादधोवनमक्खनादि खुद्दककम्मं. तत्रुपायासाति तत्रुपगमनिया, तत्र तत्र महन्ते खुद्दके च कम्मे साधनवसेन उपगच्छन्तियाति अत्थो. तस्स तस्स कम्मस्स निप्फादने समत्थायाति वुत्तं होति. तत्रुपायायाति वा तत्र तत्र कम्मे साधेतब्बे उपायभूताय. अलं कातुन्ति कातुं समत्थो होति. अलं संविधातुन्ति विचारेतुं समत्थो. सत्तमं उत्तानमेव.

पटिसम्भिदाप्पत्तसुत्तादिवण्णना निट्ठिता.