६. साळ्हसुत्तवण्णना

६७. छट्ठे पातो असितब्बभोजनं पातरासं, भुत्तं पातरासं एतेसन्ति भुत्तपातरासा. दासा नाम अन्तोजाता वा धनक्कीता वा करमरानीता वा सयं वा दासब्यं उपगता. भत्तवेतनभता कम्मकारा नाम.

निच्छातोति एत्थ छातं वुच्चति तण्हा जिघच्छाहेतुताय, सा अस्स नत्थीति निच्छातो. तेनाह ‘‘नित्तण्हो’’ति. अब्भन्तरे सन्तापकरानं किलेसानन्ति अत्तनो सन्ताने दरथपरिळाहजननेन सन्तापनकिलेसानं. अन्तोतापनकिलेसानं अभावा सीतो सीतलो भूतो जातोति सीतिभूतो. तेनाह ‘‘सीतलीभूतो’’ति. मग्गफलनिब्बानसुखानि वा पटिसंवेदेतीति सुखप्पटिसंवेदी. सेसं सुविञ्ञेय्यमेव.

साळ्हसुत्तवण्णना निट्ठिता.