२. परिसासुत्तवण्णना

१३५. दुतिये अप्पटिपुच्छित्वा विनीताति ‘‘तं किं मञ्ञथ, भिक्खवे, रूपं निच्चं वा अनिच्चं वा’’तिआदिना अप्पटिपुच्छित्वा केवलं धम्मदेसनावसेनेव विनीतपरिसा. दुब्बिनीतपरिसाति दुक्खेन विनीतपरिसा. पुच्छित्वा विनीताति ‘‘तं किं मञ्ञथ, भिक्खवे’’तिआदिना पुच्छित्वा अनुमतिग्गहणवसेन विनीता. सुविनीतपरिसाति सुखेन विनीतपरिसा. अनुमतिग्गहणवसेन विनयनञ्हि न दुक्करं होति.

परिसासुत्तवण्णना निट्ठिता.