४. नन्दनसुत्तं

९५. एकमन्तं ठितो खो नन्दनो देवपुत्तो भगवन्तं गाथाय अज्झभासि –

‘‘पुच्छामि तं गोतम भूरिपञ्ञ,

अनावटं भगवतो ञाणदस्सनं;

कथंविधं सीलवन्तं वदन्ति,

कथंविधं पञ्ञवन्तं वदन्ति;

कथंविधो दुक्खमतिच्च इरियति,

कथंविधं देवता पूजयन्ती’’ति.

‘‘यो सीलवा पञ्ञवा भावितत्तो,

समाहितो झानरतो सतीमा;

सब्बस्स सोका विगता पहीना,

खीणासवो अन्तिमदेहधारी.

‘‘तथाविधं सीलवन्तं वदन्ति,

तथाविधं पञ्ञवन्तं वदन्ति;

तथाविधो दुक्खमतिच्च इरियति,

तथाविधं देवता पूजयन्ती’’ति.