६. कामदसुत्तं

८७. सावत्थिनिदानं. एकमन्तं ठितो खो कामदो देवपुत्तो भगवन्तं एतदवोच – ‘‘दुक्करं भगवा, सुदुक्करं भगवा’’ति.

‘‘दुक्करं वापि करोन्ति (कामदाति भगवा),

सेखा सीलसमाहिता;

ठितत्ता अनगारियुपेतस्स,

तुट्ठि होति सुखावहा’’ति.

‘‘दुल्लभा भगवा यदिदं तुट्ठी’’ति.

‘‘दुल्लभं वापि लभन्ति (कामदाति भगवा),

चित्तवूपसमे रता;

येसं दिवा च रत्तो च,

भावनाय रतो मनो’’ति.

‘‘दुस्समादहं भगवा यदिदं चित्त’’न्ति.

‘‘दुस्समादहं वापि समादहन्ति (कामदाति भगवा),

इन्द्रियूपसमे रता;

ते छेत्वा मच्चुनो जालं,

अरिया गच्छन्ति कामदा’’ति.

‘‘दुग्गमो भगवा विसमो मग्गो’’ति.

‘‘दुग्गमे विसमे वापि, अरिया गच्छन्ति कामद;

अनरिया विसमे मग्गे, पपतन्ति अवंसिरा;

अरियानं समो मग्गो, अरिया हि विसमे समा’’ति.