९. पीतविमानवत्थु

७९५. ‘‘पीतवत्थे पीतधजे, पीतालङ्कारभूसिते;

पीतचन्दनलित्तङ्गे, पीतउप्पलमालिनी [पीतुप्पलमधारिनी (स्या. क.), पीतुप्पलमालिनी (पी.)].

७९६. ‘‘पीतपासादसयने, पीतासने पीतभाजने;

पीतछत्ते पीतरथे, पीतस्से पीतबीजने.

७९७. ‘‘किं कम्ममकरी भद्दे, पुब्बे मानुसके भवे;

देवते पुच्छिताचिक्ख, किस्स कम्मस्सिदं फल’’न्ति.

७९८. ‘‘कोसातकी नाम लतत्थि भन्ते, तित्तिका अनभिच्छिता;

तस्सा चत्तारि पुप्फानि, थूपं अभिहरिं अहं.

७९९. ‘‘सत्थु सरीरमुद्दिस्स, विप्पसन्नेन चेतसा;

नास्स मग्गं अवेक्खिस्सं, न तग्गमनसा [तदग्गमनसा (सी.), तदङ्गमनसा (स्या.)] सती.

८००. ‘‘ततो मं अवधी गावी, थूपं अपत्तमानसं;

तञ्चाहं अभिसञ्चेय्यं, भिय्यो [भीयो (सी. अट्ठ.)] नून इतो सिया.

८०१. ‘‘तेन कम्मेन देविन्द, मघवा देवकुञ्जरो;

पहाय मानुसं देहं, तव सहब्य [सहब्यत (सी. स्या.)] मागता’’ति.

८०२. इदं सुत्वा तिदसाधिपति, मघवा देवकुञ्जरो;

तावतिंसे पसादेन्तो, मातलिं एतदब्रवि [एतदब्रूवीति (सी.)].

८०३. ‘‘पस्स मातलि अच्छेरं, चित्तं कम्मफलं इदं;

अप्पकम्पि कतं देय्यं, पुञ्ञं होति महप्फलं.

८०४. ‘‘नत्थि चित्ते पसन्नम्हि, अप्पका नाम दक्खिणा;

तथागते वा सम्बुद्धे, अथ वा तस्स सावके.

८०५. ‘‘एहि मातलि अम्हेपि, भिय्यो भिय्यो महेमसे;

तथागतस्स धातुयो, सुखो पुञ्ञान मुच्चयो.

८०६. ‘‘तिट्ठन्ते निब्बुते चापि, समे चित्ते समं फलं;

चेतोपणिधिहेतु हि, सत्ता गच्छन्ति सुग्गतिं.

८०७. ‘‘बहूनं [बहुन्नं (सी. स्या.)] वत अत्थाय, उप्पज्जन्ति तथागता;

यत्थ कारं करित्वान, सग्गं गच्छन्ति दायका’’ति.

पीतविमानं नवमं.