४. मञ्जिट्ठकवग्गो

१. मञ्जिट्ठकविमानवत्थु

६८९. ‘‘मञ्जिट्ठके [मञ्जेट्ठके (सी.)] विमानस्मिं, सोण्णवालुकसन्थते [सोवण्णवालुकसन्थते (स्या. पी.), सोवण्णवालिकसन्थते (क.)];

पञ्चङ्गिके तुरियेन [तुरियेन (सी. स्या. पी.)], रमसि सुप्पवादिते.

६९०. ‘‘तम्हा विमाना ओरुय्ह, निम्मिता रतनामया;

ओगाहसि सालवनं, पुप्फितं सब्बकालिकं.

६९१. ‘‘यस्स यस्सेव सालस्स, मूले तिट्ठसि देवते;

सो सो मुञ्चति पुप्फानि, ओनमित्वा दुमुत्तमो.

६९२. ‘‘वातेरितं सालवनं, आधुतं [आधूतं (सी.)] दिजसेवितं;

वाति गन्धो दिसा सब्बा, रुक्खो मञ्जूसको यथा.

६९३. ‘‘घायसे तं सुचिगन्धं, रूपं पस्ससि अमानुसं;

देवते पुच्छिताचिक्ख, किस्स कम्मस्सिदं फल’’न्ति.

६९४. ‘‘अहं मनुस्सेसु मनुस्सभूता, दासी अयिरकुले [अय्यिरकुले (स्या. क.)] अहुं;

बुद्धं निसिन्नं दिस्वान, सालपुप्फेहि ओकिरिं.

६९५. ‘‘वटंसकञ्च सुकतं, सालपुप्फमयं अहं;

बुद्धस्स उपनामेसिं, पसन्ना सेहि पाणिभि.

६९६. ‘‘ताहं कम्मं करित्वान, कुसलं बुद्धवण्णितं;

अपेतसोका सुखिता, सम्पमोदामनामया’’ति.

मञ्जिट्ठकविमानं पठमं.

२. पभस्सरविमानवत्थु

६९७. ‘‘पभस्सरवरवण्णनिभे, सुरत्तवत्थवसने [वत्थनिवासने (सी. स्या.)];

महिद्धिके चन्दनरुचिरगत्ते, का त्वं सुभे देवते वन्दसे ममं.

६९८. ‘‘पल्लङ्को च ते महग्घो, नानारतनचित्तितो रुचिरो;

यत्थ त्वं निसिन्ना विरोचसि, देवराजारिव नन्दने वने.

६९९. ‘‘किं त्वं पुरे सुचरितमाचरी भद्दे, किस्स कम्मस्स विपाकं;

अनुभोसि देवलोकस्मिं, देवते पुच्छिताचिक्ख;

किस्स कम्मस्सिदं फल’’न्ति.

७००. ‘‘पिण्डाय ते चरन्तस्स, मालं फाणितञ्च अददं भन्ते;

तस्स कम्मस्सिदं विपाकं, अनुभोमि देवलोकस्मिं.

७०१. ‘‘होति च मे अनुतापो, अपरद्धं [अपराधं (स्या.)] दुक्खितञ्च [दुक्कटञ्च (सी.)] मे भन्ते;

साहं धम्मं नास्सोसिं, सुदेसितं धम्मराजेन.

७०२. ‘‘तं तं वदामि भद्दन्ते, ‘यस्स मे अनुकम्पियो कोचि;

धम्मेसु तं समादपेथ’, सुदेसितं धम्मराजेन.

७०३. ‘‘येसं अत्थि सद्धा बुद्धे, धम्मे च सङ्घरतने;

ते मं अतिविरोचन्ति, आयुना यससा सिरिया.

७०४. ‘‘पतापेन वण्णेन उत्तरितरा,

अञ्ञे महिद्धिकतरा मया देवा’’ति;

पभस्सरविमानं दुतियं.

३. नागविमानवत्थु

७०५. ‘‘अलङ्कता मणिकञ्चनाचितं, सोवण्णजालचितं महन्तं;

अभिरुय्ह गजवरं सुकप्पितं, इधागमा वेहायसं [वेहासयं (सी.)] अन्तलिक्खे.

७०६. ‘‘नागस्स दन्तेसु दुवेसु निम्मिता, अच्छोदका [अच्छोदिका (सी. क.)] पदुमिनियो सुफुल्ला;

पदुमेसु च तुरियगणा पभिज्जरे, इमा च नच्चन्ति मनोहरायो.

७०७. ‘‘देविद्धिपत्तासि महानुभावे, मनुस्सभूता किमकासि पुञ्ञं;

केनासि एवं जलितानुभावा, वण्णो च ते सब्बदिसा पभासती’’ति.

७०८. ‘‘बाराणसियं उपसङ्कमित्वा, बुद्धस्सहं वत्थयुगं अदासिं;

पादानि वन्दित्वा [वन्दित्व (सी.)] छमा निसीदिं, वित्ता चहं अञ्जलिकं अकासिं.

७०९. ‘‘बुद्धो च मे कञ्चनसन्निभत्तचो, अदेसयि समुदयदुक्खनिच्चतं;

असङ्खतं दुक्खनिरोधसस्सतं, मग्गं अदेसयि [अदेसेसि (सी.)] यतो विजानिसं;

७१०. ‘‘अप्पायुकी कालकता ततो चुता, उपपन्ना तिदसगणं यसस्सिनी;

सक्कस्सहं अञ्ञतरा पजापति, यसुत्तरा नाम दिसासु विस्सुता’’ति.

नागविमानं ततियं.

४. अलोमविमानवत्थु

७११. ‘‘अभिक्कन्तेन वण्णेन, या त्वं तिट्ठसि देवते;

ओभासेन्ती दिसा सब्बा, ओसधी विय तारका.

७१२. ‘‘केन तेतादिसो वण्णो…पे…

वण्णो च ते सब्बदिसा पभासती’’ति.

७१४. सा देवता अत्तमना…पे… यस्स कम्मस्सिदं फलं.

७१५. ‘‘अहञ्च बाराणसियं, बुद्धस्सादिच्चबन्धुनो;

अदासिं सुक्खकुम्मासं, पसन्ना सेहि पाणिभि.

७१६. ‘‘सुक्खाय अलोणिकाय च, पस्स फलं कुम्मासपिण्डिया;

अलोमं सुखितं दिस्वा, को पुञ्ञं न करिस्सति.

७१७. ‘‘तेन मेतादिसो वण्णो…पे… वण्णो च मे सब्बदिसा पभासती’’ति.

अलोमविमानं चतुत्थं.

५. कञ्जिकदायिकाविमानवत्थु

७१९. ‘‘अभिक्कन्तेन वण्णेन…पे… ओसधी विय तारका.

७२०. ‘‘केन तेतादिसो वण्णो…पे…वण्णो च मे सब्बदिसा पभासती’’ति.

७२२. सा देवता अत्तमना…पे… यस्स कम्मस्सिदं फलं.

७२३. ‘‘अहं अन्धकविन्दम्हि, बुद्धस्सादिच्चबन्धुनो;

अदासिं कोलसम्पाकं, कञ्जिकं तेलधूपितं.

७२४. ‘‘पिप्फल्या लसुणेन च, मिस्सं लामञ्जकेन च;

अदासिं उजुभूतस्मिं [उजुभूतेसु (क.)], विप्पसन्नेन चेतसा.

७२५. ‘‘या महेसित्तं कारेय्य, चक्कवत्तिस्स राजिनो;

नारी सब्बङ्गकल्याणी, भत्तु चानोमदस्सिका;

एकस्स कञ्जिकदानस्स, कलं नाग्घति सोळसिं.

७२६. ‘‘सतं निक्खा सतं अस्सा, सतं अस्सतरीरथा;

सतं कञ्ञासहस्सानि, आमुत्तमणिकुण्डला;

एकस्स कञ्जिकदानस्स, कलं नाग्घन्ति सोळसिं.

७२७. ‘‘सतं हेमवता नागा, ईसादन्ता उरूळ्हवा;

सुवण्णकच्छा मातङ्गा, हेमकप्पनवाससा;

एकस्स कञ्जिकदानस्स, कलं नाग्घन्ति सोळसिं.

७२८. ‘‘चतुन्नमपि दीपानं, इस्सरं योध कारये;

एकस्स कञ्जिकदानस्स, कलं नाग्घति सोळसि’’न्ति.

कञ्जिकदायिकाविमानं पञ्चमं.

६. विहारविमानवत्थु

७२९. ‘‘अभिक्कन्तेन वण्णेन…पे… ओसधी विय तारका.

७३०. ‘‘तस्सा ते नच्चमानाय, अङ्गमङ्गेहि सब्बसो;

दिब्बा सद्दा निच्छरन्ति, सवनीया मनोरमा.

७३१. ‘‘तस्सा ते नच्चमानाय, अङ्गमङ्गेहि सब्बसो;

दिब्बा गन्धा पवायन्ति, सुचिगन्धा मनोरमा.

७३२. ‘‘विवत्तमाना कायेन, या वेणीसु पिळन्धना;

तेसं सुय्यति निग्घोसो, तुरिये पञ्चङ्गिके यथा.

७३३. ‘‘वटंसका वातधुता, वातेन सम्पकम्पिता;

तेसं सुय्यति निग्घोसो, तुरिये पञ्चङ्गिके यथा.

७३४. ‘‘यापि ते सिरस्मिं माला, सुचिगन्धा मनोरमा;

वाति गन्धो दिसा सब्बा, रुक्खो मञ्जूसको यथा.

७३५. ‘‘घायसे तं सुचिगन्धं, रूपं पस्ससि अमानुसं;

देवते पुच्छिताचिक्ख, किस्स कम्मस्सिदं फल’’न्ति.

७३६. ‘‘सावत्थियं मय्हं सखी भदन्ते, सङ्घस्स कारेसि महाविहारं;

तत्थप्पसन्ना अहमानुमोदिं, दिस्वा अगारञ्च पियञ्च मेतं.

७३७. ‘‘तायेव मे सुद्धनुमोदनाय, लद्धं विमानब्भुतदस्सनेय्यं;

समन्ततो सोळसयोजनानि, वेहायसं गच्छति इद्धिया मम.

७३८. ‘‘कूटागारा निवेसा मे, विभत्ता भागसो मिता;

दद्दल्लमाना आभन्ति, समन्ता सतयोजनं.

७३९. ‘‘पोक्खरञ्ञो च मे एत्थ, पुथुलोमनिसेविता;

अच्छोदका [अच्छोदिका (सी.)] विप्पसन्ना, सोण्णवालुकसन्थता.

७४०. ‘‘नानापदुमसञ्छन्ना, पुण्डरीकसमोतता [पण्डरीकसमोनता (सी.)];

सुरभी सम्पवायन्ति, मनुञ्ञा मालुतेरिता.

७४१. ‘‘जम्बुयो पनसा ताला, नाळिकेरवनानि च;

अन्तोनिवेसने जाता, नानारुक्खा अरोपिमा.

७४२. ‘‘नानातूरियसङ्घुट्ठं, अच्छरागणघोसितं;

योपि मं सुपिने पस्से, सोपि वित्तो सिया नरो.

७४३. ‘‘एतादिसं अब्भुतदस्सनेय्यं, विमानं सब्बसोपभं;

मम कम्मेहि निब्बत्तं, अलं पुञ्ञानि कातवे’’ति.

७४४. ‘‘तायेव ते सुद्धनुमोदनाय, लद्धं विमानब्भुतदस्सनेय्यं;

या चेव सा दानमदासि नारी, तस्सा गतिं ब्रूहि कुहिं उप्पन्ना [उपपन्ना (क.)] सा’’ति.

७४५. ‘‘या सा अहु मय्हं सखी भदन्ते, सङ्घस्स कारेसि महाविहारं;

विञ्ञातधम्मा सा अदासि दानं, उप्पन्ना निम्मानरतीसु देवेसु.

७४६. ‘‘पजापती तस्स सुनिम्मितस्स, अचिन्तिया कम्मविपाका तस्स;

यमेतं पुच्छसि कुहिं उप्पन्ना [उपपन्ना (क.)] साति, तं ते वियाकासिं अनञ्ञथा अहं.

७४७. ‘‘तेनहञ्ञेपि समादपेथ, सङ्घस्स दानानि ददाथ वित्ता;

धम्मञ्च सुणाथ पसन्नमानसा, सुदुल्लभो लद्धो मनुस्सलाभो.

७४८. ‘‘यं मग्गं मग्गाधिपती अदेसयि [मग्गाधिपत्यदेसयि (सी.)], ब्रह्मस्सरो कञ्चनसन्निभत्तचो;

सङ्घस्स दानानि ददाथ वित्ता, महप्फला यत्थ भवन्ति दक्खिणा.

७४९. [खु. पा. ६.६; सु. नि. २२९] ‘‘ये पुग्गला अट्ठ सतं पसत्था, चत्तारि एतानि युगानि होन्ति;

ते दक्खिणेय्या सुगतस्स सावका, एतेसु दिन्नानि महप्फलानि.

७५०. [वि. व. ६४१] ‘‘चत्तारो च पटिपन्ना, चत्तारो च फले ठिता;

एस सङ्घो उजुभूतो, पञ्ञासीलसमाहितो.

७५१. [वि. व. ६४२] ‘‘यजमानानं मनुस्सानं, पुञ्ञपेक्खान पाणिनं;

करोतं ओपधिकं पुञ्ञं, सङ्घे दिन्नं महप्फलं.

७५२. [वि. व. ६४३] ‘‘एसो हि सङ्घो विपुलो महग्गतो, एसप्पमेय्यो उदधीव सागरो;

एतेहि सेट्ठा नरवीरसावका, पभङ्करा धम्ममुदीरयन्ति [नत्थेत्थ पाठभेदो].

७५३. [वि. व. ६४४] ‘‘तेसं सुदिन्नं सुहुतं सुयिट्ठं, ये सङ्घमुद्दिस्स ददन्ति दानं;

सा दक्खिणा सङ्घगता पतिट्ठिता, महप्फला लोकविदून [लोकविदूहि (क.)] वण्णिता.

७५४. ‘‘एतादिसं यञ्ञमनुस्सरन्ता, ये वेदजाता विचरन्ति लोके;

विनेय्य मच्छेरमलं समूलं, अनिन्दिता सग्गमुपेन्ति ठान’’न्ति.

विहारविमानं छट्ठं.

भाणवारं दुतियं निट्ठितं.

७. चतुरित्थिविमानवत्थु

७५५. ‘‘अभिक्कन्तेन वण्णेन…पे…वण्णो च ते सब्बदिसा पभासती’’ति.

७५८. सा देवता अत्तमना…पे… यस्स कम्मस्सिदं फलं.

७५९. ‘‘इन्दीवरानं हत्थकं अहमदासिं, भिक्खुनो पिण्डाय चरन्तस्स;

एसिकानं उण्णतस्मिं, नगरवरे पण्णकते रम्मे.

७६०. ‘‘तेन मेतादिसो वण्णो…पे…वण्णो च मे सब्बदिस्सा पभासती’’ति.

७६२. ‘‘अभिक्कन्तेन वण्णेन…पे…वण्णो च ते सब्बदिसा पभासती’’ति.

७६५. सा देवता अत्तमना…पे… यस्स कम्मस्सिदं फलं.

७६६. ‘‘नीलुप्पलहत्थकं अहमदासिं, भिक्खुनो पिण्डाय चरन्तस्स;

एसिकानं उण्णतस्मिं, नगरवरे पण्णकते रम्मे.

७६७. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

७६९. ‘‘अभिक्कन्तेन वण्णेन…पे…वण्णो च ते सब्बदिसा पभासती’’ति.