१. उळारविमानवत्थु

२८६. ‘‘उळारो ते यसो वण्णो, सब्बा ओभासते दिसा;

नारियो नच्चन्ति गायन्ति, देवपुत्ता अलङ्कता.

२८७. ‘‘मोदेन्ति परिवारेन्ति, तव पूजाय देवते;

सोवण्णानि विमानानि, तविमानि सुदस्सने.

२८८. ‘‘तुवंसि इस्सरा तेसं, सब्बकामसमिद्धिनी;

अभिजाता महन्तासि, देवकाये पमोदसि;

देवते पुच्छिताचिक्ख, किस्स कम्मस्सिदं फल’’न्ति.

२८९. ‘‘अहं मनुस्सेसु मनुस्सभूता, पुरिमाय जातिया मनुस्सलोके;

दुस्सीलकुले सुणिसा अहोसिं, अस्सद्धेसु कदरियेसु अहं.

२९०. ‘‘सद्धा सीलेन सम्पन्ना, संविभागरता सदा;

पिण्डाय चरमानस्स, अपूवं ते अदासहं.

२९१. ‘‘तदाहं सस्सुयाचिक्खिं, समणो आगतो इध;

तस्स अदासहं पूवं, पसन्ना सेहि पाणिभि.

२९२. ‘‘इतिस्सा सस्सु परिभासि, अविनीतासि त्वं [अविनीता तुवं (सी.)] वधु;

न मं सम्पुच्छितुं इच्छि, समणस्स ददामहं.

२९३. ‘‘ततो मे सस्सु कुपिता, पहासि मुसलेन मं;

कूटङ्गच्छि अवधि मं, नासक्खिं जीवितुं चिरं.

२९४. ‘‘सा अहं कायस्स भेदा, विप्पमुत्ता ततो चुता;

देवानं तावतिंसानं, उपपन्ना सहब्यतं.

२९५. ‘‘तेन मेतादिसो वण्णो…पे…वण्णो च मे सब्बदिसा पभासती’’ति.

उळारविमानं पठमं.