७. उपोसथाविमानवत्थु

२२९. ‘‘अभिक्कन्तेन वण्णेन, या त्वं तिट्ठसि देवते;

ओभासेन्ती दिसा सब्बा, ओसधी विय तारका.

२३०. ‘‘केन तेतादिसो वण्णो…पे…

वण्णो च ते सब्बदिसा पभासती’’ति.

२३२. सा देवता अत्तमना…पे… यस्स कम्मस्सिदं फलं.

२३३. ‘‘उपोसथाति मं अञ्ञंसु, साकेतायं उपासिका;

सद्धा सीलेन सम्पन्ना, संविभागरता सदा.

२३४. ‘‘अच्छादनञ्च भत्तञ्च, सेनासनं पदीपियं;

अदासिं उजुभूतेसु, विप्पसन्नेन चेतसा.

२३५. ‘‘चातुद्दसिं पञ्चदसिं, या च पक्खस्स अट्ठमी;

पाटिहारियपक्खञ्च, अट्ठङ्गसुसमागतं.

२३६. ‘‘उपोसथं उपवसिस्सं, सदा सीलेसु संवुता;

सञ्ञमा संविभागा च, विमानं आवसामहं.

२३७. ‘‘पाणातिपाता विरता, मुसावादा च सञ्ञता;

थेय्या च अतिचारा च, मज्जपाना च आरका.

२३८. ‘‘पञ्चसिक्खापदे रता, अरियसच्चान कोविदा;

उपासिका चक्खुमतो, गोतमस्स यसस्सिनो.

२३९. ‘‘तेन मेतादिसो वण्णो…पे…

वण्णो च मे सब्बदिसा पभासती’’ति.

२४१. ‘‘अभिक्खणं नन्दनं सुत्वा, छन्दो मे उदपज्जथ [उपपज्जथ (बहूसु)];

तत्थ चित्तं पणिधाय, उपपन्नम्हि नन्दनं.

२४२. ‘‘नाकासिं सत्थु वचनं, बुद्धस्सादिच्चबन्धुनो;

हीने चित्तं पणिधाय, साम्हि पच्छानुतापिनी’’ति.

२४३. ‘‘कीव चिरं विमानम्हि, इध वच्छसुपोसथे [वस्ससुपोसथे (सी.)];

देवते पुच्छिताचिक्ख, यदि जानासि आयुनो’’ति.

२४४. ‘‘सट्ठिवस्ससहस्सानि [सट्ठि सतसहस्सानि (?)], तिस्सो च वस्सकोटियो;

इध ठत्वा महामुनि, इतो चुता गमिस्सामि;

मनुस्सानं सहब्यत’’न्ति.

२४५. ‘‘मा त्वं उपोसथे भायि, सम्बुद्धेनासि ब्याकता;

सोतापन्ना विसेसयि, पहीना तव दुग्गती’’ति.

उपोसथाविमानं सत्तमं.