५. भद्दित्थिविमानवत्थु

२०६. ‘‘नीला पीता च काळा च, मञ्जिट्ठा [मञ्जेट्ठा (सी.), मञ्जट्ठा (पी.)] अथ लोहिता;

उच्चावचानं वण्णानं, किञ्जक्खपरिवारिता.

२०७. ‘‘मन्दारवानं पुप्फानं, मालं धारेसि मुद्धनि;

नयिमे अञ्ञेसु कायेसु, रुक्खा सन्ति सुमेधसे.

२०८. ‘‘केन कायं उपपन्ना, तावतिंसं यसस्सिनी;

देवते पुच्छिताचिक्ख, किस्स कम्मस्सिदं फल’’न्ति.

२०९. ‘‘भद्दित्थिकाति [भद्दित्थीति (सी.)] मं अञ्ञंसु, किमिलायं उपासिका;

सद्धा सीलेन सम्पन्ना, संविभागरता सदा.

२१०. ‘‘अच्छादनञ्च भत्तञ्च, सेनासनं पदीपियं;

अदासिं उजुभूतेसु, विप्पसन्नेन चेतसा.

२११. ‘‘चातुद्दसिं पञ्चदसिं, या च पक्खस्स अट्ठमी;

पाटिहारियपक्खञ्च, अट्ठङ्गसुसमागतं.

२१२. ‘‘उपोसथं उपवसिस्सं, सदा सीलेसु संवुता;

सञ्ञमा संविभागा च, विमानं आवसामहं.

२१३. ‘‘पाणातिपाता विरता, मुसावादा च सञ्ञता;

थेय्या च अतिचारा च, मज्जपाना च आरका.

२१४. ‘‘पञ्चसिक्खापदे रता, अरियसच्चान कोविदा;

उपासिका चक्खुमतो, अप्पमादविहारिनी.

कतावासा कतकुसला ततो चुता [कतावकासा कतकुसला (क.)],

सयं पभा अनुविचरामि नन्दनं.

२१५. ‘‘भिक्खू चाहं परमहितानुकम्पके, अभोजयिं तपस्सियुगं महामुनिं;

कतावासा कतकुसला ततो चुता [कतावकासा कतकुसला (क.)], सयं पभा अनुविचरामि नन्दनं.

२१६. ‘‘अट्ठङ्गिकं अपरिमितं सुखावहं, उपोसथं सततमुपावसिं अहं;

कतावासा कतकुसला ततो चुता [कतावकासा कतकुसला (क.)], सयं पभा अनुविचरामि नन्दन’’न्ति.

भद्दित्थिविमानं [भद्दित्थिकाविमानं (स्या.)] पञ्चमं.