२. चालाथेरीगाथा

१८२. ‘‘सतिं उपट्ठपेत्वान, भिक्खुनी भावितिन्द्रिया;

पटिविज्झि पदं सन्तं, सङ्खारूपसमं सुखं’’.

१८३. ‘‘कं नु उद्दिस्स मुण्डासि, समणी विय दिस्ससि;

न च रोचेसि पासण्डे, किमिदं चरसि मोमुहा’’.

१८४. ‘‘इतो बहिद्धा पासण्डा, दिट्ठियो उपनिस्सिता;

न ते धम्मं विजानन्ति, न ते धम्मस्स कोविदा.

१८५. ‘‘अत्थि सक्यकुले जातो, बुद्धो अप्पटिपुग्गलो;

सो मे धम्ममदेसेसि, दिट्ठीनं समतिक्कमं.

१८६. ‘‘दुक्खं दुक्खसमुप्पादं, दुक्खस्स च अतिक्कमं;

अरियं चट्ठङ्गिकं मग्गं, दुक्खूपसमगामिनं.

१८७. ‘‘तस्साहं वचनं सुत्वा, विहरिं सासने रता;

तिस्सो विज्जा अनुप्पत्ता, कतं बुद्धस्स सासनं.

१८८. ‘‘सब्बत्थ विहता नन्दी, तमोखन्धो पदालितो;

एवं जानाहि पापिम, निहतो त्वमसि अन्तक’’.

… चाला थेरी….