३. उपचालाथेरीगाथा

१८९. ‘‘सतिमती चक्खुमती, भिक्खुनी भावितिन्द्रिया;

पटिविज्झिं पदं सन्तं, अकापुरिससेवितं’’.

१९०. ‘‘किं नु जातिं न रोचेसि, जातो कामानि भुञ्जति;

भुञ्जाहि कामरतियो, माहु पच्छानुतापिनी’’.

१९१. ‘‘जातस्स मरणं होति, हत्थपादान छेदनं;

वधबन्धपरिक्लेसं, जातो दुक्खं निगच्छति.

१९२. ‘‘अत्थि सक्यकुले जातो, सम्बुद्धो अपराजितो;

सो मे धम्ममदेसेसि, जातिया समतिक्कमं.

१९३. ‘‘दुक्खं दुक्खसमुप्पादं, दुक्खस्स च अतिक्कमं;

अरियं चट्ठङ्गिकं मग्गं, दुक्खूपसमगामिनं.

१९४. ‘‘तस्साहं वचनं सुत्वा, विहरिं सासने रता;

तिस्सो विज्जा अनुप्पत्ता, कतं बुद्धस्स सासनं.

१९५. ‘‘सब्बत्थ विहता नन्दी, तमोखन्धो पदालितो;

एवं जानाहि पापिम, निहतो त्वमसि अन्तक’’.

… उपचाला थेरी….

सत्तकनिपातो निट्ठितो.