१. उत्तराथेरीगाथा

१७५. ‘‘‘मुसलानि गहेत्वान, धञ्ञं कोट्टेन्ति माणवा;

पुत्तदारानि पोसेन्ता, धनं विन्दन्ति माणवा.

१७६. ‘‘‘घटेथ बुद्धसासने, यं कत्वा नानुतप्पति;

खिप्पं पादानि धोवित्वा, एकमन्तं निसीदथ.

१७७. ‘‘‘चित्तं उपट्ठपेत्वान, एकग्गं सुसमाहितं;

पच्चवेक्खथ सङ्खारे, परतो नो च अत्ततो’.

१७८. ‘‘तस्साहं वचनं सुत्वा, पटाचारानुसासनिं;

पादे पक्खालयित्वान, एकमन्ते उपाविसिं.

१७९. ‘‘रत्तिया पुरिमे यामे, पुब्बजातिमनुस्सरिं;

रत्तिया मज्झिमे यामे, दिब्बचक्खुं विसोधयिं.

१८०. ‘‘रत्तिया पच्छिमे यामे, तमोक्खन्धं पदालयिं;

तेविज्जा अथ वुट्ठासिं, कता ते अनुसासनी.

१८१. ‘‘सक्कंव देवा तिदसा, सङ्गामे अपराजितं;

पुरक्खत्वा विहस्सामि, तेविज्जाम्हि अनासवा’’.

… उत्तरा थेरी….