७. सकुलाथेरीगाथा

९७. ‘‘अगारस्मिं वसन्तीहं, धम्मं सुत्वान भिक्खुनो;

अद्दसं विरजं धम्मं, निब्बानं पदमच्चुतं.

९८. ‘‘साहं पुत्तं धीतरञ्च, धनधञ्ञञ्च छड्डिय;

केसे छेदापयित्वान, पब्बजिं अनगारियं.

९९. ‘‘सिक्खमाना अहं सन्ती, भावेन्ती मग्गमञ्जसं;

पहासिं रागदोसञ्च, तदेकट्ठे च आसवे.

१००. ‘‘भिक्खुनी उपसम्पज्ज, पुब्बजातिमनुस्सरिं;

दिब्बचक्खु विसोधितं [विसोधितं दिब्बचक्खु (सी.)], विमलं साधुभावितं.

१०१. ‘‘सङ्खारे परतो दिस्वा, हेतुजाते पलोकिते [पलोकिने (क.)];

पहासिं आसवे सब्बे, सीतिभूताम्हि निब्बुता’’ति.

… सकुला थेरी….