६. मित्ताकाळीथेरीगाथा

९२. ‘‘सद्धाय पब्बजित्वान, अगारस्मानगारियं;

विचरिंहं तेन तेन, लाभसक्कारउस्सुका.

९३. ‘‘रिञ्चित्वा परमं अत्थं, हीनमत्थं असेविहं;

किलेसानं वसं गन्त्वा, सामञ्ञत्थं न बुज्झिहं.

९४. ‘‘तस्सा मे अहु संवेगो, निसिन्नाय विहारके;

उम्मग्गपटिपन्नाम्हि, तण्हाय वसमागता.

९५. ‘‘अप्पकं जीवितं मय्हं, जरा ब्याधि च मद्दति;

पुरायं भिज्जति [जराय भिज्जते (सी.)] कायो, न मे कालो पमज्जितुं.

९६. ‘‘यथाभूतमवेक्खन्ती, खन्धानं उदयब्बयं;

विमुत्तचित्ता उट्ठासिं, कतं बुद्धस्स सासन’’न्ति.

… मित्ता काळी थेरी….