५. नन्दुत्तराथेरीगाथा

८७. ‘‘अग्गिं चन्दञ्च सूरियञ्च, देवता च नमस्सिहं;

नदीतित्थानि गन्त्वान, उदकं ओरुहामिहं.

८८. ‘‘बहूवतसमादाना, अड्ढं सीसस्स ओलिखिं;

छमाय सेय्यं कप्पेमि, रत्तिं भत्तं न भुञ्जहं.

८९. ‘‘विभूसामण्डनरता, न्हापनुच्छादनेहि च;

उपकासिं इमं कायं, कामरागेन अट्टिता.

९०. ‘‘ततो सद्धं लभित्वान, पब्बजिं अनगारियं;

दिस्वा कायं यथाभूतं, कामरागो समूहतो.

९१. ‘‘सब्बे भवा समुच्छिन्ना, इच्छा च पत्थनापि च;

सब्बयोगविसंयुत्ता, सन्तिं पापुणि चेतसो’’ति.

… नन्दुत्तरा थेरी….