४. सुन्दरीनन्दाथेरीगाथा

८२. ‘‘आतुरं असुचिं पूतिं, पस्स नन्दे समुस्सयं;

असुभाय चित्तं भावेहि, एकग्गं सुसमाहितं.

८३. ‘‘यथा इदं तथा एतं, यथा एतं तथा इदं;

दुग्गन्धं पूतिकं वाति, बालानं अभिनन्दितं.

८४. ‘‘एवमेतं अवेक्खन्ती, रत्तिन्दिवमतन्दिता;

ततो सकाय पञ्ञाय, अभिनिब्बिज्झ [अभिनिब्बिज्ज (सी. स्या.)] दक्खिसं.

८५. ‘‘तस्सा मे अप्पमत्ताय, विचिनन्तिया योनिसो;

यथाभूतं अयं कायो, दिट्ठो सन्तरबाहिरो.

८६. ‘‘अथ निब्बिन्दहं काये, अज्झत्तञ्च विरज्जहं;

अप्पमत्ता विसंयुत्ता, उपसन्ताम्हि निब्बुता’’ति.

… सुन्दरीनन्दा थेरी….