१०. पटाचाराथेरीगाथा

११२. ‘‘नङ्गलेहि कसं खेत्तं, बीजानि पवपं छमा;

पुत्तदारानि पोसेन्ता, धनं विन्दन्ति माणवा.

११३. ‘‘किमहं सीलसम्पन्ना, सत्थुसासनकारिका;

निब्बानं नाधिगच्छामि, अकुसीता अनुद्धता.

११४. ‘‘पादे पक्खालयित्वान, उदकेसु करोमहं;

पादोदकञ्च दिस्वान, थलतो निन्नमागतं.

११५. ‘‘ततो चित्तं समाधेसिं, अस्सं भद्रंवजानियं;

ततो दीपं गहेत्वान, विहारं पाविसिं अहं;

सेय्यं ओलोकयित्वान, मञ्चकम्हि उपाविसिं.

११६. ‘‘ततो सूचिं गहेत्वान, वट्टिं ओकस्सयामहं;

पदीपस्सेव निब्बानं, विमोक्खो अहु चेतसो’’ति.

… पटाचारा थेरी….