१. अञ्ञतराथेरीगाथा

६७. ‘‘पण्णवीसतिवस्सानि, यतो पब्बजिता अहं;

नाच्छरासङ्घातमत्तम्पि, चित्तस्सूपसमज्झगं.

६८. ‘‘अलद्धा चेतसो सन्तिं, कामरागेनवस्सुता;

बाहा पग्गय्ह कन्दन्ती, विहारं पाविसिं अहं.

६९. ‘‘सा भिक्खुनिं उपागच्छिं, या मे सद्धायिका अहु;

सा मे धम्ममदेसेसि, खन्धायतनधातुयो.

७०. ‘‘तस्सा धम्मं सुणित्वान, एकमन्ते उपाविसिं;

पुब्बेनिवासं जानामि, दिब्बचक्खु विसोधितं.

७१. ‘‘चेतोपरिच्चञाणञ्च [चेतोपरियञाणञ्च (क.)], सोतधातु विसोधिता;

इद्धीपि मे सच्छिकता, पत्तो मे आसवक्खयो;

छळभिञ्ञा [छ मेभिञ्ञा (स्या. क.)] सच्छिकता, कतं बुद्धस्स सासन’’न्ति.

… अञ्ञतरा थेरी ….