२. विमलाथेरीगाथा

७२. ‘‘मत्ता वण्णेन रूपेन, सोभग्गेन यसेन च;

योब्बनेन चुपत्थद्धा, अञ्ञासमतिमञ्ञिहं.

७३. ‘‘विभूसेत्वा इमं कायं, सुचित्तं बाललापनं;

अट्ठासिं वेसिद्वारम्हि, लुद्दो पासमिवोड्डिय.

७४. ‘‘पिलन्धनं विदंसेन्ती, गुय्हं पकासिकं बहुं;

अकासिं विविधं मायं, उज्जग्घन्ती बहुं जनं.

७५. ‘‘साज्ज पिण्डं चरित्वान, मुण्डा सङ्घाटिपारुता;

निसिन्ना रुक्खमूलम्हि, अवितक्कस्स लाभिनी.

७६. ‘‘सब्बे योगा समुच्छिन्ना, ये दिब्बा ये च मानुसा;

खेपेत्वा आसवे सब्बे, सीतिभूताम्हि निब्बुता’’ति.

… विमला पुराणगणिका थेरी….