६. नळमालिकाथेरीअपदानं

८६. ‘‘चन्दभागानदीतीरे, अहोसिं किन्नरी तदा;

अद्दसं विरजं बुद्धं, सयम्भुं अपराजितं.

८७. ‘‘पसन्नचित्ता सुमना, वेदजाता कतञ्जली;

नळमालं गहेत्वान, सयम्भुं अभिपूजयिं.

८८. ‘‘तेन कम्मेन सुकतेन, चेतनापणिधीहि च;

जहित्वा किन्नरीदेहं [मानसं देहं (सी. पी. क.) सुमेधावग्गेपि], तावतिंसमगच्छहं.

८९. ‘‘छत्तिंसदेवराजूनं, महेसित्तमकारयिं;

मनसा पत्थितं मय्हं, निब्बत्तति यथिच्छितं.

९०. ‘‘दसन्नं चक्कवत्तीनं, महेसित्तमकारयिं;

ओचितत्ताव [सुचितत्ताव (पी.)] हुत्वान, संसरामि भवेस्वहं.

९१. ‘‘कुसलं विज्जते मय्हं, पब्बजिं अनगारियं;

पूजारहा अहं अज्ज, सक्यपुत्तस्स सासने.

९२. ‘‘विसुद्धमनसा अज्ज, अपेतमनपापिका;

सब्बासवपरिक्खीणा, नत्थि दानि पुनब्भवो.

९३. ‘‘चतुन्नवुतितो कप्पे, यं बुद्धमभिपूजयिं;

दुग्गतिं नाभिजानामि, नळमालायिदं फलं.

९४. ‘‘किलेसा झापिता मय्हं…पे… विहरामि अनासवा.

९५. ‘‘स्वागतं वत मे आसि…पे… कतं बुद्धस्स सासनं.

९६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं नळमालिका भिक्खुनी इमा गाथायो अभासित्थाति.

नळमालिकाथेरियापदानं छट्ठं.