२. एकूपोसथिकवग्गो

१. एकूपोसथिकाथेरीअपदानं

१. ‘‘नगरे बन्धुमतिया, बन्धुमा नाम खत्तियो;

दिवसे पुण्णमाय सो, उपवसि उपोसथं.

२. ‘‘अहं तेन समयेन, कुम्भदासी अहं तहिं;

दिस्वा सराजकं सेनं, एवाहं चिन्तयिं तदा.

३. ‘राजापि रज्जं छड्डेत्वा, उपवसि उपोसथं;

सफलं नून तं कम्मं, जनकायो पमोदितो’.

४. ‘‘योनिसो पच्चवेक्खित्वा, दुग्गच्चञ्च [दुग्गतिञ्च (स्या.)] दलिद्दतं [दळिद्दतं (सी.)];

मानसं सम्पहंसित्वा, उपवसिं उपोसथं.

५. ‘‘अहं उपोसथं कत्वा, सम्मासम्बुद्धसासने;

तेन कम्मेन सुकतेन, तावतिंसमगच्छहं.

६. ‘‘तत्थ मे सुकतं ब्यम्हं, उब्भयोजनमुग्गतं [उद्धं योजनमुग्गतं (सी. स्या. पी.)];

कूटागारवरूपेतं, महासनसुभूसितं.

७. ‘‘अच्छरा सतसहस्सा, उपतिट्ठन्ति मं सदा;

अञ्ञे देवे अतिक्कम्म, अतिरोचामि सब्बदा.

८. ‘‘चतुसट्ठि देवराजूनं, महेसित्तमकारयिं;

तेसट्ठि चक्कवत्तीनं, महेसित्तमकारयिं.

९. ‘‘सुवण्णवण्णा हुत्वान, भवेसु संसरामहं;

सब्बत्थ पवरा होमि, उपोसथस्सिदं फलं.

१०. ‘‘हत्थियानं अस्सयानं, रथयानञ्च सीविकं [केवलं (सी. स्या. पी.)];

लभामि सब्बमेवेतं, उपोसथस्सिदं फलं.

११. ‘‘सोण्णमयं रूपिमयं, अथोपि फलिकामयं;

लोहितङ्गमयञ्चेव, सब्बं पटिलभामहं.

१२. ‘‘कोसेय्यकम्बलियानि, खोमकप्पासिकानि च;

महग्घानि च वत्थानि, सब्बं पटिलभामहं.

१३. ‘‘अन्नं पानं खादनीयं, वत्थसेनासनानि च;

सब्बमेतं पटिलभे, उपोसथस्सिदं फलं.

१४. ‘‘वरगन्धञ्च मालञ्च, चुण्णकञ्च विलेपनं;

सब्बमेतं पटिलभे, उपोसथस्सिदं फलं.

१५. ‘‘कूटागारञ्च पासादं, मण्डपं हम्मियं गुहं;

सब्बमेतं पटिलभे, उपोसथस्सिदं फलं.

१६. ‘‘जातिया सत्तवस्साहं, पब्बजिं अनगारियं;

अड्ढमासे असम्पत्ते, अरहत्तमपापुणिं.

१७. ‘‘किलेसा झापिता मय्हं, भवा सब्बे समूहता;

सब्बासवपरिक्खीणा, नत्थि दानि पुनब्भवो.

१८. ‘‘एकनवुतितो कप्पे, यं कम्ममकरिं तदा;

दुग्गतिं नाभिजानामि, उपोसथस्सिदं फलं.

१९. ‘‘किलेसा झापिता मय्हं…पे… विहरामि अनासवा.

२०. ‘‘स्वागतं वत मे आसि…पे… कतं बुद्धस्स सासनं.

२१. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं एकूपोसथिका भिक्खुनी इमा गाथायो अभासित्थाति.

एकूपोसथिकाथेरियापदानं पठमं.

२. सळलपुप्फिकाथेरीअपदानं

२२. ‘‘चन्दभागानदीतीरे, अहोसिं किन्नरी तदा;

अद्दसाहं देवदेवं, चङ्कमन्तं नरासभं.

२३. ‘‘ओचिनित्वान सळलं, बुद्धसेट्ठस्सदासहं;

उपसिङ्घि महावीरो, सळलं देवगन्धिकं.

२४. ‘‘पटिग्गहेत्वा सम्बुद्धो, विपस्सी लोकनायको;

उपसिङ्घि महावीरो, पेक्खमानाय मे तदा.

२५. ‘‘अञ्जलिं पग्गहेत्वान, वन्दित्वा द्विपदुत्तमं [दिपदुत्तमं (सी. स्या. पी.)];

सकं चित्तं पसादेत्वा, ततो पब्बतमारुहिं.

२६. ‘‘एकनवुतितो कप्पे, यं पुप्फमददिं तदा;

दुग्गतिं नाभिजानामि, बुद्धपूजायिदं फलं.

२७. ‘‘किलेसा झापिता मय्हं…पे… विहरामि अनासवा.

२८. ‘‘स्वागतं वत मे आसि…पे… कतं बुद्धस्स सासनं.

२९. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं सळलपुप्फिका भिक्खुनी इमा गाथायो अभासित्थाति.

सळलपुप्फिकाथेरियापदानं दुतियं.

३. मोदकदायिकाथेरीअपदानं

३०. ‘‘नगरे बन्धुमतिया, कुम्भदासी अहोसहं;

मम भागं गहेत्वान, गच्छं उदकहारिका [उदकहारिकं (सी.), उदकहारिके (स्या.)].

३१. ‘‘पन्थम्हि समणं दिस्वा, सन्तचित्तं समाहतं;

पसन्नचित्ता सुमना, मोदके तीणिदासहं.

३२. ‘‘तेन कम्मेन सुकतेन, चेतनापणिधीहि च;

एकनवुतिकप्पानि [एकूनतिंसकप्पानि (स्या.)], विनिपातं नगच्छहं.

३३. ‘‘सम्पत्ति तं [सम्पत्तिञ्च (स्या.), सम्पत्तिकं (क.)] करित्वान, सब्बं अनुभविं अहं;

मोदके तीणि दत्वान, पत्ताहं अचलं पदं.

३४. ‘‘किलेसा झापिता मय्हं…पे… विहरामि अनासवा.

३५. ‘‘स्वागतं वत मे आसि…पे… कतं बुद्धस्स सासनं.

३६. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं मोदकदायिका भिक्खुनी इमा गाथायो अभासित्थाति.

मोदकदायिकाथेरियापदानं ततियं.

४. एकासनदायिकाथेरीअपदानं

३७. ‘‘नगरे हंसवतिया, अहोसिं बालिका [मालिका (स्या. पी.)] तदा;

माता च मे पिता चेव, कम्मन्तं अगमंसु ते.

३८. ‘‘मज्झन्हिकम्हि सूरिये, अद्दसं समणं अहं;

वीथिया अनुगच्छन्तं, आसनं पञ्ञपेसहं.

३९. ‘‘गोनकाविकतिकाहि [गोनकचित्तकादीहि (सी.)], पञ्ञपेत्वा ममासनं;

पसन्नचित्ता सुमना, इदं वचनमब्रविं.

४०. ‘‘‘सन्तत्ता कुथिता भूमि, सूरो मज्झन्हिके ठितो;

मालुता च न वायन्ति, कालो चेवेत्थ मेहिति [चेत्थ उपट्ठितो (सी.), चेवत्थं एति तं (पी.)].

४१. ‘‘‘पञ्ञत्तमासनमिदं, तवत्थाय महामुनि;

अनुकम्पं उपादाय, निसीद मम आसने’.

४२. ‘‘निसीदि तत्थ समणो, सुदन्तो सुद्धमानसो;

तस्स पत्तं गहेत्वान, यथारन्धं अदासहं.

४३. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसमगच्छहं.

४४. ‘‘तत्थ मे सुकतं ब्यम्हं, आसनेन सुनिम्मितं;

सट्ठियोजनमुब्बेधं, तिंसयोजनवित्थतं.

४५. ‘‘सोण्णमया मणिमया, अथोपि फलिकामया;

लोहितङ्गमया चेव, पल्लङ्का विविधा मम.

४६. ‘‘तूलिका विकतिकाहि, कट्टिस्सचित्तकाहि च;

उद्दएकन्तलोमी च, पल्लङ्का मे सुसण्ठिता [सुसन्थता (सी.)].

४७. ‘‘यदा इच्छामि गमनं, हासखिड्डसमप्पिता;

सह पल्लङ्कसेट्ठेन, गच्छामि मम पत्थितं.

४८. ‘‘असीति देवराजूनं, महेसित्तमकारयिं;

सत्तति चक्कवत्तीनं, महेसित्तमकारयिं.

४९. ‘‘भवाभवे संसरन्ती, महाभोगं लभामहं;

भोगे मे ऊनता नत्थि, एकासनस्सिदं फलं [एकासनफलं इदं (सब्बत्थ) एवमुपरिपि].

५०. ‘‘दुवे भवे संसरामि, देवत्ते अथ मानुसे;

अञ्ञे भवे न जानामि, एकासनस्सिदं फलं.

५१. ‘‘दुवे कुले पजायामि, खत्तिये चापि ब्राह्मणे;

उच्चाकुलीना [उच्चाकुलिका (स्या. पी. क.)] सब्बत्थ, एकासनस्सिदं फलं.

५२. ‘‘दोमनस्सं न जानामि, चित्तसन्तापनं मम;

वेवण्णियं न जानामि, एकासनस्सिदं फलं.

५३. ‘‘धातियो मं उपट्ठन्ति, खुज्जा चेलापिका [खेलापिका (सी.), चेलाविका (पी.)] बहू;

अङ्केन अङ्कं गच्छामि, एकासनस्सिदं फलं.

५४. ‘‘अञ्ञा न्हापेन्ति भोजेन्ति, अञ्ञा रमेन्ति मं सदा;

अञ्ञा गन्धं विलिम्पन्ति, एकासनस्सिदं फलं [अञ्ञा ममेव न्हापेन्ति, अञ्ञा भोजेन्ति भोजनं; अञ्ञा मं अलङ्करोन्ति, अञ्ञा रमेन्ति मं सद्धा; (स्या.)].

५५. ‘‘मण्डपे रुक्खमूले वा, सुञ्ञागारे वसन्तिया;

मम सङ्कप्पमञ्ञाय, पल्लङ्को उपतिट्ठति.

५६. ‘‘अयं पच्छिमको मय्हं, चरिमो वत्तते भवो;

अज्जापि रज्जं छड्डेत्वा, पब्बजिं अनगारियं.

५७. ‘‘सतसहस्सितो कप्पे, यं दानमददिं तदा;

दुग्गतिं नाभिजानामि, एकासनस्सिदं फलं.

५८. ‘‘किलेसा झापिता मय्हं…पे… विहरामि अनासवा.

५९. ‘‘स्वागतं वत मे आसि…पे… कतं बुद्धस्स सासनं.

६०. ‘‘पटिसम्भिदा चतस्सो…पे… कतं बुद्धस्स सासनं’’.

इत्थं सुदं एकासनदायिका भिक्खुनी इमा गाथायो अभासित्थाति.

एकासनदायिकाथेरियापदानं चतुत्थं.

५. पञ्चदीपदायिकाथेरीअपदानं

६१. ‘‘नगरे हंसवतिया, चारिकी [चारिका (सी. स्या.)] आसहं तदा;

आरामेन च आरामं [आरामेन विहारेन (स्या. पी.)], चरामि कुसलत्थिका.

६२. ‘‘काळपक्खम्हि दिवसे, अद्दसं बोधिमुत्तमं;

तत्थ चित्तं पसादेत्वा, बोधिमूले निसीदहं.

६३. ‘‘गरुचित्तं उपट्ठेत्वा, सिरे कत्वान अञ्जलिं;

सोमनस्सं पवेदेत्वा, एवं चिन्तेसि तावदे.

६४. ‘‘‘यदि बुद्धो अमितगुणो, असमप्पटिपुग्गलो;

दस्सेतु पाटिहीरं मे, बोधि ओभासतु अयं’.

६५. ‘‘सह आवज्जिते मय्हं, बोधि पज्जलि तावदे;

सब्बसोण्णमया आसि, दिसा सब्बा विरोचति.

६६. ‘‘सत्तरत्तिन्दिवं तत्थ, बोधिमूले निसीदहं;

सत्तमे दिवसे पत्ते, दीपपूजं अकासहं.

६७. ‘‘आसनं परिवारेत्वा, पञ्च दीपानि पज्जलुं;

याव उदेति सूरियो, दीपा मे पज्जलुं तदा.

६८. ‘‘तेन कम्मेन सुकतेन, चेतनापणिधीहि च;

जहित्वा मानुसं देहं, तावतिंसमगच्छहं.

६९. ‘‘तत्थ मे सुकतं ब्यम्हं, पञ्चदीपाति वुच्चति;

सट्ठियोजनमुब्बेधं, तिंसयोजनवित्थतं.

७०. ‘‘असङ्खियानि दीपानि, परिवारे जलिंसु मे;

यावता देवभवनं, दीपालोकेन जोतति.

७१. ‘‘परम्मुखा [पुब्बमुखा (स्या.)] निसीदित्वा, यदि इच्छामि पस्सितुं;

उद्धं अधो च तिरियं, सब्बं पस्सामि चक्खुना.

७२. ‘‘यावता अभिकङ्खामि, दट्ठुं सुगतदुग्गते [सुकतदुक्कटे (पी.)];

तत्थ आवरणं नत्थि, रुक्खेसु पब्बतेसु वा.

७३. ‘‘असीति देवराजूनं, महेसित्तमकारयिं;

सतानं चक्कवत्तीनं, महेसित्तमकारयिं.

७४. ‘‘यं यं योनुपपज्जामि, देवत्तं अथ मानुसं;

दीपसतसहस्सानि, परिवारे जलन्ति मे.