२. सिरिमित्तत्थेरगाथा

५०२. ‘‘अक्कोधनोनुपनाही, अमायो रित्तपेसुणो;

स वे तादिसको भिक्खु, एवं पेच्च न सोचति.

५०३. ‘‘अक्कोधनोनुपनाही, अमायो रित्तपेसुणो;

गुत्तद्वारो सदा भिक्खु, एवं पेच्च न सोचति.

५०४. ‘‘अक्कोधनोनुपनाही, अमायो रित्तपेसुणो;

कल्याणसीलो सो [यो (स्या.)] भिक्खु, एवं पेच्च न सोचति.

५०५. ‘‘अक्कोधनोनुपनाही, अमायो रित्तपेसुणो;

कल्याणमित्तो सो भिक्खु, एवं पेच्च न सोचति.

५०६. ‘‘अक्कोधनोनुपनाही, अमायो रित्तपेसुणो;

कल्याणपञ्ञो सो भिक्खु, एवं पेच्च न सोचति.

५०७. ‘‘यस्स सद्धा तथागते, अचला सुप्पतिट्ठिता;

सीलञ्च यस्स कल्याणं, अरियकन्तं पसंसितं.

५०८. ‘‘सङ्घे पसादो यस्सत्थि, उजुभूतञ्च दस्सनं;

‘अदलिद्दो’ति तं आहु, अमोघं तस्स जीवितं.

५०९. ‘‘तस्मा सद्धञ्च सीलञ्च, पसादं धम्मदस्सनं;

अनुयुञ्जेथ मेधावी, सरं बुद्धान सासन’’न्ति.

… सिरिमित्तो थेरो….