३. भद्दत्थेरगाथा

४७३. ‘‘एकपुत्तो अहं आसिं, पियो मातु पियो पितु;

बहूहि वतचरियाहि, लद्धो आयाचनाहि च.

४७४. ‘‘ते च मं अनुकम्पाय, अत्थकामा हितेसिनो;

उभो पिता च माता च, बुद्धस्स उपनामयुं’’.

४७५. ‘‘किच्छा लद्धो अयं पुत्तो, सुखुमालो सुखेधितो;

इमं ददाम ते नाथ, जिनस्स परिचारकं’’.

४७६. ‘‘सत्था च मं पटिग्गय्ह, आनन्दं एतदब्रवि;

‘पब्बाजेहि इमं खिप्पं, हेस्सत्याजानियो अयं.

४७७. ‘‘पब्बाजेत्वान मं सत्था, विहारं पाविसी जिनो;

अनोग्गतस्मिं सूरियस्मिं, ततो चित्तं विमुच्चि मे.

४७८. ‘‘ततो सत्था निराकत्वा, पटिसल्लानवुट्ठितो;

‘एहि भद्दा’ति मं आह, सा मे आसूपसम्पदा.

४७९. ‘‘जातिया सत्तवस्सेन, लद्धा मे उपसम्पदा;

तिस्सो विज्जा अनुप्पत्ता, अहो धम्मसुधम्मता’’ति.

… भद्दो थेरो….