२. सुभूतत्थेरगाथा

३२०. ‘‘अयोगे युञ्जमत्तानं, पुरिसो किच्चमिच्छको [किच्चमिच्छतो (सी.), किच्चमिच्छयं (कत्थचि)];

चरं चे नाधिगच्छेय्य, ‘तं मे दुब्भगलक्खणं’.

३२१. ‘‘अब्बूळ्हं अघगतं विजितं, एकञ्चे ओस्सजेय्य कलीव सिया;

सब्बानिपि चे ओस्सजेय्य अन्धोव सिया, समविसमस्स अदस्सनतो.

३२२. ‘‘यञ्हि कयिरा तञ्हि वदे, यं न कयिरा न तं वदे;

अकरोन्तं भासमानं, परिजानन्ति पण्डिता.

३२३. [ध. प. ५१ धम्मपदेपि] ‘‘यथापि रुचिरं पुप्फं, वण्णवन्तं अगन्धकं;

एवं सुभासिता वाचा, अफला होति अकुब्बतो.

३२४. [ध. प. ५२] ‘‘यथापि रुचिरं पुप्फं, वण्णवन्तं सुगन्धकं [सगन्धकं (सी. स्या. पी.)];

एवं सुभासिता वाचा, सफला होति कुब्बतो’’ति [सकुब्बतो (सी. पी.), सुकुब्बतो (स्या.)].

… सुभूतो थेरो….