८. राहुलत्थेरगाथा

२९५. ‘‘उभयेनेव सम्पन्नो, राहुलभद्दोति मं विदू;

यञ्चम्हि पुत्तो बुद्धस्स, यञ्च धम्मेसु चक्खुमा.

२९६. ‘‘यञ्च मे आसवा खीणा, यञ्च नत्थि पुनब्भवो;

अरहा दक्खिणेय्योम्हि, तेविज्जो अमतद्दसो.

२९७. ‘‘कामन्धा जालपच्छन्ना, तण्हाछादनछादिता;

पमत्तबन्धुना बद्धा, मच्छाव कुमिनामुखे.

२९८. ‘‘तं कामं अहमुज्झित्वा, छेत्वा मारस्स बन्धनं;

समूलं तण्हमब्बुय्ह, सीतिभूतोस्मि निब्बुतो’’ति.

… राहुलो थेरो….