१. नागसमालत्थेरगाथा

२६७. ‘‘अलङ्कता सुवसना, मालिनी चन्दनुस्सदा;

मज्झे महापथे नारी, तुरिये नच्चति नट्टकी.

२६८. ‘‘पिण्डिकाय पविट्ठोहं, गच्छन्तो नं उदिक्खिसं;

अलङ्कतं सुवसनं, मच्चुपासंव ओड्डितं.

२६९. ‘‘ततो मे मनसीकारो, योनिसो उदपज्जथ;

आदीनवो पातुरहु, निब्बिदा समतिट्ठथ [सम्पतिट्ठथ (क.)].

२७०. ‘‘ततो चित्तं विमुच्चि मे, पस्स धम्मसुधम्मतं;

तिस्सो विज्जा अनुप्पत्ता, कतं बुद्धस्स सासन’’न्ति.

… नागसमालो थेरो….