५. पञ्चमवग्गो

१. कुमारकस्सपत्थेरगाथा

२०१. ‘‘अहो बुद्धा अहो धम्मा, अहो नो सत्थु सम्पदा;

यत्थ एतादिसं धम्मं, सावको सच्छिकाहि’’ति.

२०२. ‘‘असङ्खेय्येसु कप्पेसु, सक्कायाधिगता अहू;

तेसमयं पच्छिमको, चरिमोयं समुस्सयो;

जातिमरणसंसारो, नत्थि दानि पुनब्भवो’’ति.

… कुमारकस्सपो थेरो….

२. धम्मपालत्थेरगाथा

२०३. ‘‘यो हवे दहरो भिक्खु, युञ्जति बुद्धसासने;

जागरो स हि सुत्तेसु [पतिसुत्तेसु (सी. क.)], अमोघं तस्स जीवितं.

२०४. ‘‘तस्मा सद्धञ्च सीलञ्च, पसादं धम्मदस्सनं;

अनुयुञ्जेथ मेधावी, सरं बुद्धान सासन’’न्ति.

… धम्मपालो थेरो….

३. ब्रह्मालित्थेरगाथा

२०५. ‘‘कस्सिन्द्रियानि समथङ्गतानि, अस्सा यथा सारथिना सुदन्ता;

पहीनमानस्स अनासवस्स, देवापि कस्स [तस्स (बहूसु)] पिहयन्ति तादिनो’’ति.

२०६. [ध. प. ९४ धम्मपदेपि] ‘‘मय्हिन्द्रियानि समथङ्गतानि, अस्सा यथा सारथिना सुदन्ता;

पहीनमानस्स अनासवस्स, देवापि मय्हं पिहयन्ति तादिनो’’ति.

… ब्रह्मालि थेरो….

४. मोघराजत्थेरगाथा

२०७. ‘‘छविपापक चित्तभद्दक, मोघराज सततं समाहितो;

हेमन्तिकसीतकालरत्तियो [हेमन्तिककालरत्तियो (क.)], भिक्खु त्वंसि कथं करिस्ससि’’.

२०८. ‘‘सम्पन्नसस्सा मगधा, केवला इति मे सुतं;

पलालच्छन्नको सेय्यं, यथञ्ञे सुखजीविनो’’ति.

… मोघराजा थेरो….

५. विसाखपञ्चालपुत्तत्थेरगाथा

२०९. ‘‘न उक्खिपे नो च परिक्खिपे परे, ओक्खिपे पारगतं न एरये;

न चत्तवण्णं परिसासु ब्याहरे, अनुद्धतो सम्मितभाणि सुब्बतो.

२१०. ‘‘सुसुखुमनिपुणत्थदस्सिना, मतिकुसलेन निवातवुत्तिना;

संसेवितवुद्धसीलिना, निब्बानं न हि तेन दुल्लभ’’न्ति.

… विसाखो पञ्चालपुत्तो थेरो ….

६. चूळकत्थेरगाथा

२११. ‘‘नदन्ति मोरा सुसिखा सुपेखुणा, सुनीलगीवा सुमुखा सुगज्जिनो;

सुसद्दला चापि महामही अयं, सुब्यापितम्बु सुवलाहकं नभं.

२१२. ‘‘सुकल्लरूपो सुमनस्स झायतं [झायितं (स्या. क.)], सुनिक्कमो साधु सुबुद्धसासने;

सुसुक्कसुक्कं निपुणं सुदुद्दसं, फुसाहि तं उत्तममच्चुतं पद’’न्ति.

… चूळको [चूलको (सी. अट्ठ.)] थेरो….

७. अनूपमत्थेरगाथा

२१३. ‘‘नन्दमानागतं चित्तं, सूलमारोपमानकं;

तेन तेनेव वजसि, येन सूलं कलिङ्गरं.

२१४. ‘‘ताहं चित्तकलिं ब्रूमि, तं ब्रूमि चित्तदुब्भकं;

सत्था ते दुल्लभो लद्धो, मानत्थे मं नियोजयी’’ति.

… अनूपमो थेरो….

८. वज्जितत्थेरगाथा

२१५. ‘‘संसरं दीघमद्धानं, गतीसु परिवत्तिसं;

अपस्सं अरियसच्चानि, अन्धभूतो [अन्धीभूतो (क.)] पुथुज्जनो.

२१६. ‘‘तस्स मे अप्पमत्तस्स, संसारा विनळीकता;

सब्बा गती समुच्छिन्ना, नत्थि दानि पुनब्भवो’’ति.

… वज्जितो थेरो….

९. सन्धितत्थेरगाथा

२१७. ‘‘अस्सत्थे हरितोभासे, संविरूळ्हम्हि पादपे;

एकं बुद्धगतं सञ्ञं, अलभित्थं [अलभिं हं (क.)] पतिस्सतो.

२१८. ‘‘एकतिंसे इतो कप्पे, यं सञ्ञमलभिं तदा;

तस्सा सञ्ञाय वाहसा, पत्तो मे आसवक्खयो’’ति.

… सन्धितो थेरो….

वग्गो पञ्चमो निट्ठितो.

तस्सुद्दानं –

कुमारकस्सपो थेरो, धम्मपालो च ब्रह्मालि;

मोघराजा विसाखो च, चूळको च अनूपमो;

वज्जितो सन्धितो थेरो, किलेसरजवाहनोति.

दुकनिपातो निट्ठितो.