३. ततियवग्गो

१. उत्तरत्थेरगाथा

१६१. ‘‘खन्धा मया परिञ्ञाता, तण्हा मे सुसमूहता;

भाविता मम बोज्झङ्गा, पत्तो मे आसवक्खयो.

१६२. ‘‘सोहं खन्धे परिञ्ञाय, अब्बहित्वान [अब्बुहित्वान (क.)] जालिनिं;

भावयित्वान बोज्झङ्गे, निब्बायिस्सं अनासवो’’ति.

… उत्तरो थेरो….

२. भद्दजित्थेरगाथा

१६३. ‘‘पनादो नाम सो राजा, यस्स यूपो सुवण्णयो;

तिरियं सोळसुब्बेधो [सोळसपब्बेधो (सी. अट्ठ.), सोळसब्बाणो (?)], उब्भमाहु [उद्धमाहु (सी.), उच्चमाहु (स्या.)] सहस्सधा.

१६४. ‘‘सहस्सकण्डो सतगेण्डु, धजालु हरितामयो;

अनच्चुं तत्थ गन्धब्बा, छसहस्सानि सत्तधा’’ति.

… भद्दजित्थेरो….

३. सोभितत्थेरगाथा

१६५. ‘‘सतिमा पञ्ञवा भिक्खु, आरद्धबलवीरियो;

पञ्च कप्पसतानाहं, एकरत्तिं अनुस्सरिं.

१६६. ‘‘चत्तारो सतिपट्ठाने, सत्त अट्ठ च भावयं;

पञ्च कप्पसतानाहं, एकरत्तिं अनुस्सरि’’न्ति.

… सोभितो थेरो….

४. वल्लियत्थेरगाथा

१६७. ‘‘यं किच्चं दळ्हवीरियेन, यं किच्चं बोद्धुमिच्छता;

करिस्सं नावरज्झिस्सं [नावरुज्झिस्सं (क. सी. क.)], पस्स वीरियं परक्कम.

१६८. ‘‘त्वञ्च मे मग्गमक्खाहि, अञ्जसं अमतोगधं;

अहं मोनेन मोनिस्सं, गङ्गासोतोव सागर’’न्ति.

… वल्लियो थेरो….

५. वीतसोकत्थेरगाथा

१६९. ‘‘केसे मे ओलिखिस्सन्ति, कप्पको उपसङ्कमि;

ततो आदासमादाय, सरीरं पच्चवेक्खिसं.

१७०. ‘‘तुच्छो कायो अदिस्सित्थ, अन्धकारो तमो ब्यगा;

सब्बे चोळा समुच्छिन्ना, नत्थि दानि पुनब्भवो’’ति.

… वीतसोको थेरो….

६. पुण्णमासत्थेरगाथा

१७१. ‘‘पञ्च नीवरणे हित्वा, योगक्खेमस्स पत्तिया;

धम्मादासं गहेत्वान, ञाणदस्सनमत्तनो.

१७२. ‘‘पच्चवेक्खिं इमं कायं, सब्बं सन्तरबाहिरं;

अज्झत्तञ्च बहिद्धा च, तुच्छो कायो अदिस्सथा’’ति.

… पुण्णमासो थेरो….

७. नन्दकत्थेरगाथा

१७३. ‘‘यथापि भद्दो आजञ्ञो, खलित्वा पतितिट्ठति;

भिय्यो लद्दान संवेगं, अदीनो वहते धुरं.

१७४. ‘‘एवं दस्सनसम्पन्नं, सम्मासम्बुद्धसावकं;

आजानीयं मं धारेथ, पुत्तं बुद्धस्स ओरस’’न्ति.

… नन्दको थेरो….

८. भरतत्थेरगाथा

१७५. ‘‘एहि नन्दक गच्छाम, उपज्झायस्स सन्तिकं;

सीहनादं नदिस्साम, बुद्धसेट्ठस्स सम्मुखा.

१७६. ‘‘याय नो अनुकम्पाय, अम्हे पब्बाजयी मुनि;

सो नो अत्थो अनुप्पत्तो, सब्बसंयोजनक्खयो’’ति.

… भरतो थेरो….

९. भारद्वाजत्थेरगाथा

१७७. ‘‘नदन्ति एवं सप्पञ्ञा, सीहाव गिरिगब्भरे;

वीरा विजितसङ्गामा, जेत्वा मारं सवाहनिं [सवाहनं (बहूसु)].

१७८. ‘‘सत्था च परिचिण्णो मे, धम्मो सङ्घो च पूजितो;

अहञ्च वित्तो सुमनो, पुत्तं दिस्वा अनासव’’न्ति.

… भारद्वाजो थेरो….

१०. कण्हदिन्नत्थेरगाथा

१७९. ‘‘उपासिता सप्पुरिसा, सुता धम्मा अभिण्हसो;

सुत्वान पटिपज्जिस्सं, अञ्जसं अमतोगधं.

१८०. ‘‘भवरागहतस्स मे सतो, भवरागो पुन मे न विज्जति;

न चाहु न च मे भविस्सति, न च मे एतरहि विज्जती’’ति.

… कण्हदिन्नो थेरो….

वग्गो ततियो निट्ठितो.

तस्सुद्दानं –

उत्तरो भद्दजित्थेरो, सोभितो वल्लियो इसि;

वीतसोको च यो थेरो, पुण्णमासो च नन्दको;

भरतो भारद्वाजो च, कण्हदिन्नो महामुनीति.