२. सारिपुत्तत्थेरगाथा

९८१. ‘‘यथाचारी यथासतो सतीमा, यतसङ्कप्पज्झायि अप्पमत्तो;

अज्झत्तरतो समाहितत्तो, एको सन्तुसितो तमाहु भिक्खुं.

९८२. ‘‘अल्लं सुक्खं वा भुञ्जन्तो, न बाळ्हं सुहितो सिया;

ऊनूदरो मिताहारो, सतो भिक्खु परिब्बजे.

९८३. ‘‘चत्तारो पञ्च आलोपे, अभुत्वा उदकं पिवे;

अलं फासुविहाराय, पहितत्तस्स भिक्खुनो.

९८४. ‘‘कप्पियं तं चे छादेति, चीवरं इदमत्थिकं [इदमत्थितं (सी.)];

अलं फासुविहाराय, पहितत्तस्स भिक्खुनो.

९८५. ‘‘पल्लङ्केन निसिन्नस्स, जण्णुके नाभिवस्सति;

अलं फासुविहाराय, पहितत्तस्स भिक्खुनो.

९८६. [सं. नि. ४.२५३; इतिवु. ५३] ‘‘यो सुखं दुक्खतो अद्द, दुक्खमद्दक्खि सल्लतो;

उभयन्तरेन [उभयमन्तरे (सी.)] नाहोसि, केन लोकस्मि किं सिया.

९८७. ‘‘मा मे कदाचि पापिच्छो, कुसीतो हीनवीरियो;

अप्पस्सुतो अनादरो, केन लोकस्मि किं सिया.

९८८. ‘‘बहुस्सुतो च मेधावी, सीलेसु सुसमाहितो;

चेतोसमथमनुयुत्तो, अपि मुद्धनि तिट्ठतु.

९८९. ‘‘यो पपञ्चमनुयुत्तो, पपञ्चाभिरतो मगो;

विराधयी सो निब्बानं, योगक्खेमं अनुत्तरं.

९९०. ‘‘यो च पपञ्चं हित्वान, निप्पपञ्चपथे रतो;

आराधयी सो निब्बानं, योगक्खेमं अनुत्तरं.

९९१. [ध. प. ९८] ‘‘गामे वा यदि वारञ्ञे, निन्ने वा यदि वा थले;

यत्थ अरहन्तो विहरन्ति, तं भूमिरामणेय्यकं.

९९२. ‘‘रमणीयानि अरञ्ञानि, यत्थ न रमती जनो;

वीतरागा रमिस्सन्ति, न ते कामगवेसिनो.

९९३. [ध. प. ७६] ‘‘निधीनंव पवत्तारं, यं पस्से वज्जदस्सिनं;

निग्गय्हवादिं मेधाविं, तादिसं पण्डितं भजे;

तादिसं भजमानस्स, सेय्यो होति न पापियो.

९९४. [ध. प. ७७] ‘‘ओवदेय्यानुसासेय्य, असब्भा च निवारये;

सतञ्हि सो पियो होति, असतं होति अप्पियो.

९९५. ‘‘अञ्ञस्स भगवा बुद्धो, धम्मं देसेसि चक्खुमा;

धम्मे देसियमानम्हि, सोतमोधेसिमत्थिको;

तं मे अमोघं सवनं, विमुत्तोम्हि अनासवो.

९९६. ‘‘नेव पुब्बेनिवासाय, नपि दिब्बस्स चक्खुनो;

चेतोपरियाय इद्धिया, चुतिया उपपत्तिया;

सोतधातुविसुद्धिया, पणिधी मे न विज्जति [कथा. ३७८].

९९७. ‘‘रुक्खमूलंव निस्साय, मुण्डो सङ्घाटिपारुतो;

पञ्ञाय उत्तमो थेरो, उपतिस्सोव [उपतिस्सो च (सी. क.)] झायति.

९९८. ‘‘अवितक्कं समापन्नो, सम्मासम्बुद्धसावको;

अरियेन तुण्हीभावेन, उपेतो होति तावदे.

९९९. [उदा. २४] ‘‘यथापि पब्बतो सेलो, अचलो सुप्पतिट्ठितो;

एवं मोहक्खया भिक्खु, पब्बतोव न वेधति.

१०००. ‘‘अनङ्गणस्स पोसस्स, निच्चं सुचिगवेसिनो;

वालग्गमत्तं पापस्स, अब्भमत्तंव खायति.

१००१. ‘‘नाभिनन्दामि मरणं, नाभिनन्दामि जीवितं;

निक्खिपिस्सं इमं कायं, सम्पजानो पतिस्सतो.

१००२. ‘‘नाभिनन्दामि मरणं, नाभिनन्दामि जीवितं;

कालञ्च पटिकङ्खामि, निब्बिसं भतको यथा.

१००३. ‘‘उभयेन मिदं मरणमेव, नामरणं पच्छा वा पुरे वा;

पटिपज्जथ मा विनस्सथ, खणो वो मा उपच्चगा.

१००४. ‘‘नगरं यथा पच्चन्तं, गुत्तं सन्तरबाहिरं;

एवं गोपेथ अत्तानं, खणो वो मा उपच्चगा;

खणातीता हि सोचन्ति, निरयम्हि समप्पिता.

१००५. ‘‘उपसन्तो उपरतो, मन्तभाणी [मत्तभाणी (सी.)] अनुद्धतो;

धुनाति पापके धम्मे, दुमपत्तंव मालुतो.

१००६. ‘‘उपसन्तो उपरतो, मन्तभाणी अनुद्धतो;

अप्पासि [अब्बहि (स्या.), अभासि (?)] पापके धम्मे, दुमपत्तंव मालुतो.

१००७. ‘‘उपसन्तो अनायासो, विप्पसन्नो अनाविलो;

कल्याणसीलो मेधावी, दुक्खस्सन्तकरो सिया.

१००८. ‘‘न विस्ससे एकतियेसु एवं, अगारिसु पब्बजितेसु चापि;

साधूपि हुत्वा न असाधु होन्ति, असाधु हुत्वा पुन साधु होन्ति.

१००९. ‘‘कामच्छन्दो च ब्यापादो, थिनमिद्धञ्च भिक्खुनो;

उद्धच्चं विचिकिच्छा च, पञ्चेते चित्तकेलिसा.

१०१०. ‘‘यस्स सक्करियमानस्स, असक्कारेन चूभयं;

समाधि न विकम्पति, अप्पमादविहारिनो.

१०११. ‘‘तं झायिनं साततिकं, सुखुमदिट्ठिविपस्सकं;

उपादानक्खयारामं, आहु सप्पुरिसो इति.

१०१२. ‘‘महासमुद्दो पथवी, पब्बतो अनिलोपि च;

उपमाय न युज्जन्ति, सत्थु वरविमुत्तिया.

१०१३. ‘‘चक्कानुवत्तको थेरो, महाञाणी समाहितो;

पथवापग्गिसमानो, न रज्जति न दुस्सति.

१०१४. ‘‘पञ्ञापारमितं पत्तो, महाबुद्धि महामति;

अजळो जळसमानो, सदा चरति निब्बुतो.

१०१५. ‘‘परिचिण्णो मया सत्था…पे… भवनेत्ति समूहता.

१०१६. ‘‘सम्पादेथप्पमादेन, एसा मे अनुसासनी;

हन्दाहं परिनिब्बिस्सं, विप्पमुत्तोम्हि सब्बधी’’ति.

… सारिपुत्तो थेरो….