२. एकविहारियत्थेरगाथा

५३७. ‘‘पुरतो पच्छतो वापि, अपरो चे न विज्जति;

अतीव फासु भवति, एकस्स वसतो वने.

५३८. ‘‘हन्द एको गमिस्सामि, अरञ्ञं बुद्धवण्णितं;

फासु [फासुं (स्या. पी.)] एकविहारिस्स, पहितत्तस्स भिक्खुनो.

५३९. ‘‘योगी-पीतिकरं रम्मं, मत्तकुञ्जरसेवितं;

एको अत्तवसी खिप्पं, पविसिस्सामि काननं.

५४०. ‘‘सुपुप्फिते सीतवने, सीतले गिरिकन्दरे;

गत्तानि परिसिञ्चित्वा, चङ्कमिस्सामि एकको.

५४१. ‘‘एकाकियो अदुतियो, रमणीये महावने;

कदाहं विहरिस्सामि, कतकिच्चो अनासवो.

५४२. ‘‘एवं मे कत्तुकामस्स, अधिप्पायो समिज्झतु;

साधियिस्सामहंयेव, नाञ्ञो अञ्ञस्स कारको.

५४३. ‘‘एस बन्धामि सन्नाहं, पविसिस्सामि काननं;

न ततो निक्खमिस्सामि, अप्पत्तो आसवक्खयं.

५४४. ‘‘मालुते उपवायन्ते, सीते सुरभिगन्धिके [गन्धके (स्या. पी. क.)];

अविज्जं दालयिस्सामि, निसिन्नो नगमुद्धनि.

५४५. ‘‘वने कुसुमसञ्छन्ने, पब्भारे नून सीतले;

विमुत्तिसुखेन सुखितो, रमिस्सामि गिरिब्बजे.

५४६. ‘‘सोहं परिपुण्णसङ्कप्पो, चन्दो पन्नरसो यथा;

सब्बासवपरिक्खीणो, नत्थि दानि पुनब्भवो’’ति.

… एकविहारियो थेरो….