९. नवमवग्गो

८१. ‘‘यं मया पकतं पापं, पुब्बे अञ्ञासु जातिसु;

इधेव तं वेदनीयं, वत्थु अञ्ञं न विज्जती’’ति.

… समितिगुत्तो थेरो….

८२. ‘‘येन येन सुभिक्खानि, सिवानि अभयानि च;

तेन पुत्तक गच्छस्सु, मा सोकापहतो भवा’’ति.

… कस्सपो थेरो….

८३. ‘‘सीहप्पमत्तो विहर, रत्तिन्दिवमतन्दितो;

भावेहि कुसलं धम्मं, जह सीघं समुस्सय’’न्ति.

… सीहो थेरो….

८४. ‘‘सब्बरत्तिं सुपित्वान, दिवा सङ्गणिके रतो;

कुदास्सु नाम दुम्मेधो, दुक्खस्सन्तं करिस्सती’’ति.

… नीतो थेरो….

८५. ‘‘चित्तनिमित्तस्स कोविदो, पविवेकरसं विजानिय;

झायं निपको पतिस्सतो, अधिगच्छेय्य सुखं निरामिस’’न्ति.

… सुनागो थेरो….

८६. ‘‘इतो बहिद्धा पुथु अञ्ञवादिनं, मग्गो न निब्बानगमो यथा अयं;

इतिस्सु सङ्घं भगवानुसासति, सत्था सयं पाणितलेव दस्सय’’न्ति.

… नागितो थेरो….

८७. ‘‘खन्धा दिट्ठा यथाभूतं, भवा सब्बे पदालिता;

विक्खीणो जातिसंसारो, नत्थि दानि पुनब्भवो’’ति.

… पविट्ठो थेरो….

८८. ‘‘असक्खिं वत अत्तानं, उद्धातुं उदका थलं;

वुय्हमानो महोघेव, सच्चानि पटिविज्झह’’न्ति.

… अज्जुनो थेरो….

८९. ‘‘उत्तिण्णा पङ्कपलिपा, पाताला परिवज्जिता;

मुत्तो ओघा च गन्था च, सब्बे माना विसंहता’’ति.

… देवसभो थेरो….

९०. ‘‘पञ्चक्खन्धा परिञ्ञाता, तिट्ठन्ति छिन्नमूलका;

विक्खीणो जातिसंसारो, नत्थि दानि पुनब्भवो’’ति.

… सामिदत्तो थेरो….

वग्गो नवमो निट्ठितो.

तस्सुद्दानं –

थेरो समितिगुत्तो च, कस्सपो सीहसव्हयो;

नीतो सुनागो नागितो, पविट्ठो अज्जुनो इसि;

देवसभो च यो थेरो, सामिदत्तो महब्बलोति.