१०. दसमवग्गो

१. परिपुण्णकत्थेरगाथा

९१. ‘‘न तथा मतं सतरसं, सुधन्नं यं मयज्ज परिभुत्तं;

अपरिमितदस्सिना गोतमेन, बुद्धेन देसितो धम्मो’’ति.

… परिपुण्णको थेरो….

२. विजयत्थेरगाथा

९२. ‘‘यस्सासवा परिक्खीणा, आहारे च अनिस्सितो;

सुञ्ञता अनिमित्तो च, विमोक्खो यस्स गोचरो;

आकासेव सकुन्तानं, पदं तस्स दुरन्नय’’न्ति.

… विजयो थेरो….

३. एरकत्थेरगाथा

९३. ‘‘दुक्खा कामा एरक, न सुखा कामा एरक;

यो कामे कामयति, दुक्खं सो कामयति एरक;

यो कामे न कामयति, दुक्खं सो न कामयति एरका’’ति.

… एरको थेरो….

४. मेत्तजित्थेरगाथा

९४. ‘‘नमो हि तस्स भगवतो, सक्यपुत्तस्स सिरीमतो;

तेनायं अग्गप्पत्तेन, अग्गधम्मो [अग्गो धम्मो (सी.)] सुदेसितो’’ति.

… मेत्तजि थेरो….

५. चक्खुपालत्थेरगाथा

९५. ‘‘अन्धोहं हतनेत्तोस्मि, कन्तारद्धानपक्खन्दो [पक्खन्नो (सी.), पक्कन्तो (स्या. सी. अट्ठ.)];

सयमानोपि गच्छिस्सं, न सहायेन पापेना’’ति.

… चक्खुपालो थेरो….

६. खण्डसुमनत्थेरगाथा

९६. ‘‘एकपुप्फं चजित्वान, असीति [असीतिं (सी.)] वस्सकोटियो;

सग्गेसु परिचारेत्वा, सेसकेनम्हि निब्बुतो’’ति.

… खण्डसुमनो थेरो….

७. तिस्सत्थेरगाथा

९७. ‘‘हित्वा सतपलं कंसं, सोवण्णं सतराजिकं;

अग्गहिं मत्तिकापत्तं, इदं दुतियाभिसेचन’’न्ति.

… तिस्सो थेरो….

८. अभयत्थेरगाथा

९८. ‘‘रूपं दिस्वा सति मुट्ठा, पियं निमित्तं मनसिकरोतो;

सारत्तचित्तो वेदेति, तञ्च अज्झोस तिट्ठति;

तस्स वड्ढन्ति आसवा, भवमूलोपगामिनो’’ति [भवमूला भवगामिनोति (सी. क.)].

… अभयो थेरो….

९. उत्तियत्थेरगाथा

९९. ‘‘सद्दं सुत्वा सति मुट्ठा, पियं निमित्तं मनसिकरोतो;

सारत्तचित्तो वेदेति, तञ्च अज्झोस तिट्ठति;

तस्स वड्ढन्ति आसवा, संसारं उपगामिनो’’ति.

… उत्तियो थेरो….

१०. (दुतिय)-देवसभत्थेरगाथा

१००. ‘‘सम्मप्पधानसम्पन्नो, सतिपट्ठानगोचरो;

विमुत्तिकुसुमसञ्छन्नो, परिनिब्बिस्सत्यनासवो’’ति.

… देवसभो थेरो….

वग्गो दसमो निट्ठितो.

तस्सुद्दानं –

परिपुण्णको च विजयो, एरको मेत्तजी मुनि;

चक्खुपालो खण्डसुमनो, तिस्सो च अभयो तथा;

उत्तियो च महापञ्ञो, थेरो देवसभोपि चाति.