११. एकादसमवग्गो

१. बेलट्ठानिकत्थेरगाथा

१०१. ‘‘हित्वा गिहित्तं अनवोसितत्तो, मुखनङ्गली ओदरिको कुसीतो;

महावराहोव निवापपुट्ठो, पुनप्पुनं गब्भमुपेति मन्दो’’ति.

… बेलट्ठानिको थेरो….

२. सेतुच्छत्थेरगाथा

१०२. ‘‘मानेन वञ्चितासे, सङ्खारेसु संकिलिस्समानासे;

लाभालाभेन मथिता, समाधिं नाधिगच्छन्ती’’ति.

… सेतुच्छो थेरो….

३. बन्धुरत्थेरगाथा

१०३. ‘‘नाहं एतेन अत्थिको, सुखितो धम्मरसेन तप्पितो;

पित्वा [पीत्वान (सी. स्या.)] रसग्गमुत्तमं, न च काहामि विसेन सन्थव’’न्ति.

… बन्धुरो [बन्धनो (क.)] थेरो….

४. खितकत्थेरगाथा

१०४. ‘‘लहुको वत मे कायो, फुट्ठो च पीतिसुखेन विपुलेन;

तूलमिव एरितं मालुतेन, पिलवतीव मे कायो’’ति.

… खितको थेरो….

५. मलितवम्भत्थेरगाथा

१०५. ‘‘उक्कण्ठितोपि न वसे, रममानोपि पक्कमे;

न त्वेवानत्थसंहितं, वसे वासं विचक्खणो’’ति.

… मलितवम्भो थेरो….

६. सुहेमन्तत्थेरगाथा

१०६. ‘‘सतलिङ्गस्स अत्थस्स, सतलक्खणधारिनो;

एकङ्गदस्सी दुम्मेधो, सतदस्सी च पण्डितो’’ति.

… सुहेमन्तो थेरो….

७. धम्मसवत्थेरगाथा

१०७. ‘‘पब्बजिं तुलयित्वान, अगारस्मानगारियं;

तिस्सो विज्जा अनुप्पत्ता, कतं बुद्धस्स सासन’’न्ति.

… धम्मसवो थेरो….

८. धम्मसवपितुत्थेरगाथा

१०८. ‘‘स वीसवस्ससतिको, पब्बजिं अनगारियं;

तिस्सो विज्जा अनुप्पत्ता, कतं बुद्धस्स सासन’’न्ति.

… धम्मसवपितु थेरो….

९. सङ्घरक्खितत्थेरगाथा

१०९. ‘‘न नूनायं परमहितानुकम्पिनो, रहोगतो अनुविगणेति सासनं;

तथाहयं विहरति पाकतिन्द्रियो, मिगी यथा तरुणजातिका वने’’ति.

… सङ्घरक्खितो थेरो….

१०. उसभत्थेरगाथा

११०. ‘‘नगा नगग्गेसु सुसंविरूळ्हा, उदग्गमेघेन नवेन सित्ता;

विवेककामस्स अरञ्ञसञ्ञिनो, जनेति भिय्यो उसभस्स कल्यत’’न्ति.

… उसभो थेरो….

वग्गो एकादसमो निट्ठितो.

तस्सुद्दानं –

बेलट्ठानिको सेतुच्छो, बन्धुरो खितको इसि;

मलितवम्भो सुहेमन्तो, धम्मसवो धम्मसवपिता;

सङ्घरक्खितत्थेरो च, उसभो च महामुनीति.