८. अट्ठमवग्गो

७१. ‘‘सुसुखुमनिपुणत्थदस्सिना, मतिकुसलेन निवातवुत्तिना;

संसेवितवुद्धसीलिना [संसेवितबुद्धसीलिना (क.)], निब्बानं न हि तेन दुल्लभ’’न्ति.

… वच्छपालो थेरो….

७२. ‘‘यथा कळीरो सुसु वड्ढितग्गो, दुन्निक्खमो होति पसाखजातो;

एवं अहं भरियायानिताय, अनुमञ्ञं मं पब्बजितोम्हि दानी’’ति.

… आतुमो थेरो….

७३. ‘‘जिण्णञ्च दिस्वा दुखितञ्च ब्याधितं, मतञ्च दिस्वा गतमायुसङ्खयं;

ततो अहं निक्खमितून पब्बजिं, पहाय कामानि मनोरमानी’’ति.

… माणवो थेरो….

७४. ‘‘कामच्छन्दो च ब्यापादो, थिनमिद्धञ्च [थीनमिद्धञ्च (सी. स्या.)] भिक्खुनो;

उद्धच्चं विचिकिच्छा च, सब्बसोव न विज्जती’’ति.

… सुयामनो थेरो….

७५. ‘‘साधु सुविहितान दस्सनं, कङ्खा छिज्जति बुद्धि वड्ढति;

बालम्पि करोन्ति पण्डितं, तस्मा साधु सतं समागमो’’ति.

… सुसारदो थेरो….

७६. ‘‘उप्पतन्तेसु निपते, निपतन्तेसु उप्पते;

वसे अवसमानेसु, रममानेसु नो रमे’’ति.

… पियञ्जहो थेरो….

७७. ‘‘इदं पुरे चित्तमचारि चारिकं, येनिच्छकं यत्थकामं यथासुखं;

तदज्जहं निग्गहेस्सामि योनिसो, हत्थिप्पभिन्नं विय अङ्कुसग्गहो’’ति.

… हत्थारोहपुत्तो थेरो….

७८. ‘‘अनेकजातिसंसारं, सन्धाविस्सं अनिब्बिसं;

तस्स मे दुक्खजातस्स, दुक्खक्खन्धो अपरद्धो’’ति.

… मेण्डसिरो थेरो….

७९. ‘‘सब्बो रागो पहीनो मे, सब्बो दोसो समूहतो;

सब्बो मे विगतो मोहो, सीतिभूतोस्मि निब्बुतो’’ति.

… रक्खितो थेरो….

८०. ‘‘यं मया पकतं कम्मं, अप्पं वा यदि वा बहुं;

सब्बमेतं परिक्खीणं, नत्थि दानि पुनब्भवो’’ति.

… उग्गो थेरो….

वग्गो अट्ठमो निट्ठितो.

तस्सुद्दानं –

वच्छपालो च यो थेरो, आतुमो माणवो इसि;

सुयामनो सुसारदो, थेरो यो च पियञ्जहो;

आरोहपुत्तो मेण्डसिरो, रक्खितो उग्गसव्हयोति.