७. सत्तमवग्गो

१. वप्पत्थेरगाथा

६१. ‘‘पस्सति पस्सो पस्सन्तं, अपस्सन्तञ्च पस्सति;

अपस्सन्तो अपस्सन्तं, पस्सन्तञ्च न पस्सती’’ति.

… वप्पो थेरो….

२. वज्जिपुत्तत्थेरगाथा

६२. ‘‘एकका मयं अरञ्ञे विहराम, अपविद्धंव वनस्मिं दारुकं;

तस्स मे बहुका पिहयन्ति, नेरयिका विय सग्गगामिन’’न्ति.

… वज्जिपुत्तो थेरो….

३. पक्खत्थेरगाथा

६३. ‘‘चुता पतन्ति पतिता, गिद्धा च पुनरागता;

कतं किच्चं रतं रम्मं, सुखेनन्वागतं सुख’’न्ति.

… पक्खो थेरो….

४. विमलकोण्डञ्ञत्थेरगाथा

६४. ‘‘दुमव्हयाय उप्पन्नो, जातो पण्डरकेतुना;

केतुहा केतुनायेव, महाकेतुं पधंसयी’’ति.

… विमलकोण्डञ्ञो थेरो….

५. उक्खेपकतवच्छत्थेरगाथा

६५. ‘‘उक्खेपकतवच्छस्स, सङ्कलितं बहूहि वस्सेहि;

तं भासति गहट्ठानं, सुनिसिन्नो उळारपामोज्जो’’ति.

… उक्खेपकतवच्छो थेरो….

६. मेघियत्थेरगाथा

६६. ‘‘अनुसासि महावीरो, सब्बधम्मान पारगू;

तस्साहं धम्मं सुत्वान, विहासिं सन्तिके सतो;

तिस्सो विज्जा अनुप्पत्ता, कतं बुद्धस्स सासन’’न्ति.

… मेघियो थेरो….

७. एकधम्मसवनीयत्थेरगाथा

६७. ‘‘किलेसा झापिता मय्हं, भवा सब्बे समूहता;

विक्खीणो जातिसंसारो, नत्थि दानि पुनब्भवो’’ति.

… एकधम्मसवनीयो थेरो….

८. एकुदानियत्थेरगाथा

६८. [उदा. ३७; पाचि. १५३] ‘‘अधिचेतसो अप्पमज्जतो, मुनिनो मोनपथेसु सिक्खतो;

सोका न भवन्ति तादिनो, उपसन्तस्स सदा सतीमतो’’ति.

… एकुदानियो थेरो….

९. छन्नत्थेरगाथा

६९. ‘‘सुत्वान धम्मं महतो महारसं, सब्बञ्ञुतञ्ञाणवरेन देसितं;

मग्गं पपज्जिं [पपज्जं (क.)] अमतस्स पत्तिया, सो योगक्खेमस्स पथस्स कोविदो’’ति.

… छन्नो थेरो….

१०. पुण्णत्थेरगाथा

७०. ‘‘सीलमेव इध अग्गं, पञ्ञवा पन उत्तमो;

मनुस्सेसु च देवेसु, सीलपञ्ञाणतो जय’’न्ति.

… पुण्णो थेरो….

वग्गो सत्तमो निट्ठितो.

तस्सुद्दानं –

वप्पो च वज्जिपुत्तो च, पक्खो विमलकोण्डञ्ञो;

उक्खेपकतवच्छो च, मेघियो एकधम्मिको;

एकुदानियछन्ना च, पुण्णत्थेरो महब्बलोति.