६. छट्ठवग्गो

१. गोधिकत्थेरगाथा

५१. ‘‘वस्सति देवो यथा सुगीतं, छन्ना मे कुटिका सुखा निवाता;

चित्तं सुसमाहितञ्च मय्हं, अथ चे पत्थयसि पवस्स देवा’’ति.

… गोधिको थेरो….

२. सुबाहुत्थेरगाथा

५२. ‘‘वस्सति देवो यथा सुगीतं, छन्ना मे कुटिका सुखा निवाता;

चित्तं सुसमाहितञ्च काये, अथ चे पत्थयसि पवस्स देवा’’ति.

… सुबाहुत्थेरो….

३. वल्लियत्थेरगाथा

५३. ‘‘वस्सति देवो यथा सुगीतं, छन्ना मे कुटिका सुखा निवाता;

तस्सं विहरामि अप्पमत्तो, अथ चे पत्थयसि पवस्स देवा’’ति.

… वल्लियो थेरो….

४. उत्तियत्थेरगाथा

५४. ‘‘वस्सति देवो यथा सुगीतं, छन्ना मे कुटिका सुखा निवाता;

तस्सं विहरामि अदुतियो, अथ चे पत्थयसि पवस्स देवा’’ति.

… उत्तियो थेरो….

५. अञ्जनवनियत्थेरगाथा

५५. ‘‘आसन्दिं कुटिकं कत्वा, ओगय्ह अञ्जनं वनं;

तिस्सो विज्जा अनुप्पत्ता, कतं बुद्धस्स सासन’’न्ति.

… अञ्जनवनियो थेरो….

६. कुटिविहारित्थेरगाथा

५६. ‘‘को कुटिकायं भिक्खु कुटिकायं, वीतरागो सुसमाहितचित्तो;

एवं जानाहि आवुसो, अमोघा ते कुटिका कता’’ति.

… कुटिविहारित्थेरो….

७. दुतियकुटिविहारित्थेरगाथा

५७. ‘‘अयमाहु पुराणिया कुटि, अञ्ञं पत्थयसे नवं कुटिं;

आसं कुटिया विराजय, दुक्खा भिक्खु पुन नवा कुटी’’ति.

… दुतियकुटिविहारित्थेरो….

८. रमणीयकुटिकत्थेरगाथा

५८. ‘‘रमणीया मे कुटिका, सद्धादेय्या मनोरमा;

न मे अत्थो कुमारीहि, येसं अत्थो तहिं गच्छथ नारियो’’ति.

… रमणीयकुटिको थेरो….

९. कोसलविहारित्थेरगाथा

५९. ‘‘सद्धायाहं पब्बजितो, अरञ्ञे मे कुटिका कता;

अप्पमत्तो च आतापी, सम्पजानो पतिस्सतो’’ति [पटिस्सतोति (क.)].

… कोसलविहारित्थेरो….

१०. सीवलित्थेरगाथा

६०. ‘‘ते मे इज्झिंसु सङ्कप्पा, यदत्थो पाविसिं कुटिं;

विज्जाविमुत्तिं पच्चेसं, मानानुसयमुज्जह’’न्ति.

… सीवलित्थेरो….

वग्गो छट्ठो निट्ठितो.

तस्सुद्दानं –

गोधिको च सुबाहु च, वल्लियो उत्तियो इसि;

अञ्जनवनियो थेरो, दुवे कुटिविहारिनो;

रमणीयकुटिको च, कोसलव्हयसीवलीति.