५. पञ्चमवग्गो

१. सिरिवड्ढत्थेरगाथा

४१. ‘‘विवरमनुपतन्ति विज्जुता, वेभारस्स च पण्डवस्स च;

नगविवरगतो च झायति, पुत्तो अप्पटिमस्स तादिनो’’ति.

… सिरिवड्ढो थेरो….

२. खदिरवनियत्थेरगाथा

४२. ‘‘चाले उपचाले सीसूपचाले ( ) [(चाला उपचाला, सीसूपचाला) (क.)] पतिस्सता [पटिस्सतिका (स्या. क.)] नु खो विहरथ;

आगतो वो वालं विय वेधी’’ति.

… खदिरवनियो थेरो….

३. सुमङ्गलत्थेरगाथा

४३. ‘‘सुमुत्तिको सुमुत्तिको साहु, सुमुत्तिकोम्हि तीहि खुज्जकेहि;

असितासु मया नङ्गलासु, मया खुद्दकुद्दालासु मया.

यदिपि इधमेव इधमेव, अथ वापि अलमेव अलमेव;

झाय सुमङ्गल झाय सुमङ्गल, अप्पमत्तो विहर सुमङ्गला’’ति.

… सुमङ्गलो थेरो….

४. सानुत्थेरगाथा

४४. [सं. नि. १.२३९] ‘‘मतं वा अम्म रोदन्ति, यो वा जीवं न दिस्सति;

जीवन्तं मं अम्म पस्सन्ती, कस्मा मं अम्म रोदसी’’ति.

… सानुत्थेरो….

५. रमणीयविहारित्थेरगाथा

४५. ‘‘यथापि भद्दो आजञ्ञो, खलित्वा पतितिट्ठति;

एवं दस्सनसम्पन्नं, सम्मासम्बुद्धसावक’’न्ति.

… रमणीयविहारित्थेरो….

६. समिद्धित्थेरगाथा

४६. ‘‘सद्धायाहं पब्बजितो, अगारस्मानगारियं;

सति पञ्ञा च मे वुड्ढा, चित्तञ्च सुसमाहितं;

कामं करस्सु रूपानि, नेव मं ब्याधयिस्ससी’’ति [बाधयिस्ससीति (सी.), ब्याथयिस्ससीति (?)].

… समिद्धित्थेरो….

७. उज्जयत्थेरगाथा

४७. ‘‘नमो ते बुद्ध वीरत्थु, विप्पमुत्तोसि सब्बधि;

तुय्हापदाने विहरं, विहरामि अनासवो’’ति.

… उज्जयो थेरो….

८. सञ्जयत्थेरगाथा

४८. ‘‘यतो अहं पब्बजितो, अगारस्मानगारियं;

नाभिजानामि सङ्कप्पं, अनरियं दोससंहित’’न्ति.

… सञ्जयो थेरो….

९. रामणेय्यकत्थेरगाथा

४९. ‘‘चिहचिहाभिनदिते [विहविहाभिनदिते (सी. स्या.)], सिप्पिकाभिरुतेहि च;

न मे तं फन्दति चित्तं, एकत्तनिरतं हि मे’’ति.

… रामणेय्यको थेरो….

१०. विमलत्थेरगाथा

५०. ‘‘धरणी च सिञ्चति वाति, मालुतो विज्जुता चरति नभे;

उपसमन्ति वितक्का, चित्तं सुसमाहितं ममा’’ति.

… विमलो थेरो….

वग्गो पञ्चमो निट्ठितो.

तस्सुद्दानं –

सिरीवड्ढो रेवतो थेरो, सुमङ्गलो सानुसव्हयो;

रमणीयविहारी च, समिद्धिउज्जयसञ्जया;

रामणेय्यो च सो थेरो, विमलो च रणञ्जहोति.