४. चतुत्थवग्गो

३१. ‘‘फुट्ठो डंसेहि मकसेहि, अरञ्ञस्मिं ब्रहावने;

नागो संगामसीसेव, सतो तत्राधिवासये’’ति.

… गह्वरतीरियो थेरो….

३२. ‘‘अजरं जीरमानेन, तप्पमानेन निब्बुतिं;

निमियं [निम्मिस्सं (सी.), निरामिसं (स्या.), निमिनेय्यं (?)] परमं सन्तिं, योगक्खेमं अनुत्तर’’न्ति.

… सुप्पियो थेरो….

३३. ‘‘यथापि एकपुत्तस्मिं, पियस्मिं कुसली सिया;

एवं सब्बेसु पाणेसु, सब्बत्थ कुसलो सिया’’ति.

… सोपाको थेरो….

३४. ‘‘अनासन्नवरा एता, निच्चमेव विजानता;

गामा अरञ्ञमागम्म, ततो गेहं उपाविसि [उपाविसिं (सी.)];

ततो उट्ठाय पक्कामि, अनामन्तेत्वा [अनामन्तिय (सी.)] पोसियो’’ति.

… पोसियो थेरो….

३५. ‘‘सुखं सुखत्थो लभते तदाचरं, कित्तिञ्च पप्पोति यसस्स वड्ढति;

यो अरियमट्ठङ्गिकमञ्जसं उजुं, भावेति मग्गं अमतस्स पत्तिया’’ति.

… सामञ्ञकानित्थेरो….

३६. ‘‘साधु सुतं साधु चरितकं, साधु सदा अनिकेतविहारो;

अत्थपुच्छनं पदक्खिणकम्मं, एतं सामञ्ञमकिञ्चनस्सा’’ति.

… कुमापुत्तो थेरो….

३७. ‘‘नानाजनपदं यन्ति, विचरन्ता असञ्ञता;

समाधिञ्च विराधेन्ति, किंसु रट्ठचरिया करिस्सति;

तस्मा विनेय्य सारम्भं, झायेय्य अपुरक्खतो’’ति.

… कुमापुत्तत्थेरस्स सहायको थेरो….

३८. ‘‘यो इद्धिया सरभुं अट्ठपेसि, सो गवम्पति असितो अनेजो;

तं सब्बसङ्गातिगतं महामुनिं, देवा नमस्सन्ति भवस्स पारगु’’न्ति.

… गवम्पतित्थेरो….

३९. [सं. नि. १.२१, ९७]‘‘सत्तिया विय ओमट्ठो, डय्हमानोव [डय्हमानेव (सब्बत्थ)] मत्थके;

कामरागप्पहानाय, सतो भिक्खु परिब्बजे’’ति.

… तिस्सो थेरो….

४०. ‘‘सत्तिया विय ओमट्ठो, डय्हमानोव मत्थके;

भवरागप्पहानाय, सतो भिक्खु परिब्बजे’’ति.

… वड्ढमानो थेरो….

वग्गो चतुत्थो निट्ठितो.

तस्सुद्दानं –

गह्वरतीरियो सुप्पियो, सोपाको चेव पोसियो;

सामञ्ञकानि कुमापुत्तो, कुमापुत्तसहायको;

गवम्पति तिस्सत्थेरो, वड्ढमानो महायसोति.