३. ततियवग्गो

२१. ‘‘नाहं भयस्स भायामि, सत्था नो अमतस्स कोविदो;

यत्थ भयं नावतिट्ठति, तेन मग्गेन वजन्ति भिक्खवो’’ति.

… निग्रोधो थेरो….

२२. ‘‘नीला सुगीवा सिखिनो, मोरा कारम्भियं [कारंवियं (सी.), कारवियं (स्या.)] अभिनदन्ति;

ते सीतवातकीळिता [सीतवातकद्दितकलिता (सी.), सीतवातकलिता (स्या.)], सुत्तं झायं [झानं (स्या.), झायिं (?)] निबोधेन्ती’’ति.

… चित्तको थेरो….

२३. ‘‘अहं खो वेळुगुम्बस्मिं, भुत्वान मधुपायसं;

पदक्खिणं सम्मसन्तो, खन्धानं उदयब्बयं;

सानुं पटिगमिस्सामि, विवेकमनुब्रूहय’’न्ति.

… गोसालो थेरो….

२४. ‘‘अनुवस्सिको पब्बजितो, पस्स धम्मसुधम्मतं;

तिस्सो विज्जा अनुप्पत्ता, कतं बुद्धस्स सासन’’न्ति.

… सुगन्धो थेरो….

२५. ‘‘ओभासजातं फलगं, चित्तं यस्स अभिण्हसो;

तादिसं भिक्खुमासज्ज, कण्ह दुक्खं निगच्छसी’’ति.

… नन्दियो थेरो….

२६. ‘‘सुत्वा सुभासितं वाचं, बुद्धस्सादिच्चबन्धुनो;

पच्चब्यधिं हि निपुणं, वालग्गं उसुना यथा’’ति.

… अभयो थेरो….

२७. ‘‘दब्बं कुसं पोटकिलं, उसीरं मुञ्जपब्बजं;

उरसा पनुदिस्सामि, विवेकमनुब्रूहय’’न्ति.

… लोमसकङ्गियो थेरो….

२८. ‘‘कच्चि नो वत्थपसुतो, कच्चि नो भूसनारतो;

कच्चि सीलमयं गन्धं, किं त्वं वायसि [कच्चि सीलमयं गन्धं, त्वं वासि (स्या.)] नेतरा पजा’’ति.

… जम्बुगामिकपुत्तो थेरो….

२९. ‘‘समुन्नमयमत्तानं, उसुकारोव तेजनं;

चित्तं उजुं करित्वान, अविज्जं भिन्द हारिता’’ति.

… हारितो थेरो….

३०. ‘‘आबाधे मे समुप्पन्ने, सति मे उदपज्जथ;

आबाधो मे समुप्पन्नो, कालो मे नप्पमज्जितु’’न्ति.

… उत्तियो थेरो….

वग्गो ततियो निट्ठितो.

तस्सुद्दानं –

निग्रोधो चित्तको थेरो, गोसालथेरो सुगन्धो;

नन्दियो अभयो थेरो, थेरो लोमसकङ्गियो;

जम्बुगामिकपुत्तो च, हारितो उत्तियो इसीति.