१२. मुनिसुत्तं

२०९. सन्थवातो [सन्धवतो (क.)] भयं जातं, निकेता जायते रजो;

अनिकेतमसन्थवं, एतं वे मुनिदस्सनं.

२१०. यो जातमुच्छिज्ज न रोपयेय्य, जायन्तमस्स नानुप्पवेच्छे;

तमाहु एकं मुनिनं चरन्तं, अद्दक्खि सो सन्तिपदं महेसि.

२११. सङ्खाय वत्थूनि पमाय [पहाय (क. सी. क.), समाय (क.) प + मी + त्वा = पमाय, यथा निस्सायातिपदं] बीजं, सिनेहमस्स नानुप्पवेच्छे;

स वे मुनी जातिखयन्तदस्सी, तक्कं पहाय न उपेति सङ्खं.

२१२. अञ्ञाय सब्बानि निवेसनानि, अनिकामयं अञ्ञतरम्पि तेसं;

स वे मुनी वीतगेधो अगिद्धो, नायूहती पारगतो हि होति.

२१३. सब्बाभिभुं सब्बविदुं सुमेधं, सब्बेसु धम्मेसु अनूपलित्तं;

सब्बञ्जहं तण्हक्खये विमुत्तं, तं वापि धीरा मुनि [मुनिं (सी. पी.)] वेदयन्ति.

२१४. पञ्ञाबलं सीलवतूपपन्नं, समाहितं झानरतं सतीमं;

सङ्गा पमुत्तं अखिलं अनासवं, तं वापि धीरा मुनि वेदयन्ति.

२१५. एकं चरन्तं मुनिमप्पमत्तं, निन्दापसंसासु अवेधमानं;

सीहंव सद्देसु असन्तसन्तं, वातंव जालम्हि असज्जमानं;

पद्मंव [पदुमंव (सी. स्या. पी.)] तोयेन अलिप्पमानं [अलिम्पमानं (स्या. क.)], नेतारमञ्ञेसमनञ्ञनेय्यं;

तं वापि धीरा मुनि वेदयन्ति.

२१६. यो ओगहणे थम्भोरिवाभिजायति, यस्मिं परे वाचापरियन्तं [वाचं परियन्तं (क.)] वदन्ति;

तं वीतरागं सुसमाहितिन्द्रियं, तं वापि धीरा मुनि वेदयन्ति.

२१७. यो वे ठितत्तो तसरंव उज्जु, जिगुच्छति कम्मेहि पापकेहि;

वीमंसमानो विसमं समञ्च, तं वापि धीरा मुनि वेदयन्ति.

२१८. यो सञ्ञतत्तो न करोति पापं, दहरो मज्झिमो च मुनि [दहरो च मज्झो च मुनी (सी. स्या. कं. पी.)] यतत्तो;

अरोसनेय्यो न सो रोसेति कञ्चि [न रोसेति (स्या.)], तं वापि धीरा मुनि वेदयन्ति.

२१९. यदग्गतो मज्झतो सेसतो वा, पिण्डं लभेथ परदत्तूपजीवी;

नालं थुतुं नोपि निपच्चवादी, तं वापि धीरा मुनि वेदयन्ति.

२२०. मुनिं चरन्तं विरतं मेथुनस्मा, यो योब्बने नोपनिबज्झते क्वचि;

मदप्पमादा विरतं विप्पमुत्तं, तं वापि धीरा मुनि वेदयन्ति.

२२१. अञ्ञाय लोकं परमत्थदस्सिं, ओघं समुद्दं अतितरिय तादिं;

तं छिन्नगन्थं असितं अनासवं, तं वापि धीरा मुनि वेदयन्ति.

२२२. असमा उभो दूरविहारवुत्तिनो, गिही [गिहि (क.)] दारपोसी अममो च सुब्बतो;

परपाणरोधाय गिही असञ्ञतो, निच्चं मुनी रक्खति पाणिने [पाणिनो (सी.)] यतो.

२२३. सिखी यथा नीलगीवो [नीलगिवो (स्या.)] विहङ्गमो, हंसस्स नोपेति जवं कुदाचनं;

एवं गिही नानुकरोति भिक्खुनो, मुनिनो विवित्तस्स वनम्हि झायतोति.

मुनिसुत्तं द्वादसमं निट्ठितं.

उरगवग्गो पठमो निट्ठितो.