७. राजपुत्तपेतवत्थु

७५३. पुब्बे कतानं कम्मानं, विपाको मथये मनं;

रूपे सद्दे रसे गन्धे, फोट्ठब्बे च मनोरमे.

७५४. नच्चं गीतं रतिं खिड्डं, अनुभुत्वा अनप्पकं;

उय्याने परिचरित्वा, पविसन्तो गिरिब्बजं.

७५५. इसिं सुनेत्त [सुनित (क.)] मद्दक्खि, अत्तदन्तं समाहितं;

अप्पिच्छं हिरिसम्पन्नं, उञ्छे पत्तगते रतं.

७५६. हत्थिक्खन्धतो ओरुय्ह, लद्धा भन्तेति चाब्रवि;

तस्स पत्तं गहेत्वान, उच्चं पग्गय्ह खत्तियो.

७५७. थण्डिले पत्तं भिन्दित्वा, हसमानो अपक्कमि;

‘‘रञ्ञो कितवस्साहं पुत्तो, किं मं भिक्खु करिस्ससि’’.

७५८. तस्स कम्मस्स फरुसस्स, विपाको कटुको अहु;

यं राजपुत्तो वेदेसि, निरयम्हि समप्पितो.

७५९. छळेव चतुरासीति, वस्सानि नवुतानि च;

भुसं दुक्खं निगच्छित्थो, निरये कतकिब्बिसो.

७६०. उत्तानोपि च पच्चित्थ, निकुज्जो वामदक्खिणो;

उद्धंपादो ठितो चेव, चिरं बालो अपच्चथ.

७६१. बहूनि वस्ससहस्सानि, पूगानि नहुतानि च;

भुसं दुक्खं निगच्छित्थो, निरये कतकिब्बिसो.

७६२. एतादिसं खो कटुकं, अप्पदुट्ठप्पदोसिनं;

पच्चन्ति पापकम्मन्ता, इसिमासज्ज सुब्बतं.

७६३. सो तत्थ बहुवस्सानि, वेदयित्वा बहुं दुखं;

खुप्पिपासहतो नाम [खुप्पिपासाहतो नाम (सी. पी)], पेतो आसि ततो चुतो.

७६४. एतमादीनवं ञत्वा [दिस्वा (सी.)], इस्सरमदसम्भवं;

पहाय इस्सरमदं, निवातमनुवत्तये.

७६५. दिट्ठेव धम्मे पासंसो, यो बुद्धेसु सगारवो;

कायस्स भेदा सप्पञ्ञो, सग्गं सो उपपज्जतीति.

राजपुत्तपेतवत्थु सत्तमं.