४. रेवतीपेतवत्थु

७१४. [वि. व. ८६३] ‘‘उट्ठेहि रेवते सुपापधम्मे, अपारुतद्वारे अदानसीले;

नेस्साम तं यत्थ थुनन्ति दुग्गता, समप्पिता [समज्जता (सी.)] नेरयिका दुखेना’’ति.

७१५. इच्चेव [इच्चेवं (स्या. क.)] वत्वान यमस्स दूता, ते द्वे यक्खा लोहितक्खा ब्रहन्ता;

पच्चेकबाहासु गहेत्वा रेवतं, पक्कामयुं देवगणस्स सन्तिके.

७१६. ‘‘आदिच्चवण्णं रुचिरं पभस्सरं, ब्यम्हं सुभं कञ्चनजालछन्नं;

कस्सेतमाकिण्णजनं विमानं, सुरियस्स रंसीरिव जोतमानं.

७१७. ‘‘नारीगणा चन्दनसारलित्ता [चन्दनसारानुलित्ता (स्या.)], उभतो विमानं उपसोभयन्ति;

तं दिस्सति सुरियसमानवण्णं, को मोदति सग्गपत्तो विमाने’’ति.

७१८. ‘‘बाराणसियं नन्दियो नामासि, उपासको अमच्छरी दानपति वदञ्ञू;

तस्सेतमाकिण्णजनं विमानं, सुरियस्स रंसीरिव जोतमानं.

७१९. ‘‘नारीगणा चन्दनसारलित्ता, उभतो विमानं उपसोभयन्ति;

तं दिस्सति सुरियसमानवण्णं, सो मोदति सग्गपत्तो विमाने’’ति.

७२०. ‘‘नन्दियस्साहं भरिया, अगारिनी सब्बकुलस्स इस्सरा;

भत्तु विमाने रमिस्सामि दानहं, न पत्थये निरयदस्सनाया’’ति.

७२१. ‘‘एसो ते निरयो सुपापधम्मे, पुञ्ञं तया अकतं जीवलोके;

न हि मच्छरी रोसको पापधम्मो, सग्गूपगानं लभति सहब्यत’’न्ति.

७२२. ‘‘किं नु गूथञ्च मुत्तञ्च, असुची पटिदिस्सति;

दुग्गन्धं किमिदं मीळ्हं, किमेतं उपवायती’’ति.

७२३. ‘‘एस संसवको नाम, गम्भीरो सतपोरिसो;

यत्थ वस्ससहस्सानि, तुवं पच्चसि रेवते’’ति.

७२४. ‘‘किं नु कायेन वाचाय, मनसा दुक्कटं कतं;

केन संसवको लद्धो, गम्भीरो सतपोरिसो’’ति.

७२५. ‘‘समणे ब्राह्मणे चापि, अञ्ञे वापि वनिब्बके;

मुसावादेन वञ्चेसि, तं पापं पकतं तया.

७२६. ‘‘तेन संसवको लद्धो, गम्भीरो सतपोरिसो;

तत्थ वस्ससहस्सानि, तुवं पच्चसि रेवते.

७२७. ‘‘हत्थेपि छिन्दन्ति अथोपि पादे, कण्णेपि छिन्दन्ति अथोपि नासं;

अथोपि काकोळगणा समेच्च, सङ्गम्म खादन्ति विफन्दमान’’न्ति.

७२८. ‘‘साधु खो मं पटिनेथ, काहामि कुसलं बहुं;

दानेन समचरियाय, संयमेन दमेन च;

यं कत्वा सुखिता होन्ति, न च पच्छानुतप्परे’’ति.

७२९. ‘‘पुरे तुवं पमज्जित्वा, इदानि परिदेवसि;

सयं कतानं कम्मानं, विपाकं अनुभोस्ससी’’ति.

७३०. ‘‘को देवलोकतो मनुस्सलोकं, गन्त्वान पुट्ठो मे एवं वदेय्य;

‘निक्खित्तदण्डेसु ददाथ दानं, अच्छादनं सेय्य [सयन (सी.)] मथन्नपानं;

न हि मच्छरी रोसको पापधम्मो, सग्गूपगानं लभति सहब्यतं’.

७३१. ‘‘साहं नून इतो गन्त्वा, योनिं लद्धान मानुसिं;

वदञ्ञू सीलसम्पन्ना, काहामि कुसलं बहुं;

दानेन समचरियाय, संयमेन दमेन च.

७३२. ‘‘आरामानि च रोपिस्सं, दुग्गे सङ्कमनानि च;

पपञ्च उदपानञ्च, विप्पसन्नेन चेतसा.

७३३. ‘‘चातुद्दसिं पञ्चदसिं, या च पक्खस्स अट्ठमी;

पाटिहारियपक्खञ्च, अट्ठङ्गसुसमागतं.

७३४. ‘‘उपोसथं उपवसिस्सं, सदा सीलेसु संवुता;

न च दाने पमज्जिस्सं, सामं दिट्ठमिदं मया’’ति.

७३५. इच्चेवं विप्पलपन्तिं, फन्दमानं ततो ततो;

खिपिंसु निरये घोरे, उद्धंपादं अवंसिरं.

७३६. ‘‘अहं पुरे मच्छरिनी अहोसिं, परिभासिका समणब्राह्मणानं;

वितथेन च सामिकं वञ्चयित्वा, पच्चामहं निरये घोररूपे’’ति.

रेवतीपेतवत्थु चतुत्थं.