९. महापेसकारपेतिवत्थु

५४. ‘‘गूथञ्च मुत्तं रुहिरञ्च पुब्बं, परिभुञ्जति किस्स अयं विपाको;

अयं नु किं कम्ममकासि नारी, या सब्बदा लोहितपुब्बभक्खा.

५५. ‘‘नवानि वत्थानि सुभानि चेव, मुदूनि सुद्धानि च लोमसानि;

दिन्नानि मिस्सा कितका [किटका (क.)] भवन्ति, अयं नु किं कम्ममकासि नारी’’ति.

५६. ‘‘भरिया ममेसा अहू भदन्ते, अदायिका मच्छरिनी कदरिया;

सा मं ददन्तं समणब्राह्मणानं, अक्कोसति च परिभासति च.

५७. ‘‘‘गूथञ्च मुत्तं रुहिरञ्च पुब्बं, परिभुञ्ज त्वं असुचिं सब्बकालं;

एतं ते परलोकस्मिं होतु, वत्था च ते किटकसमा भवन्तु’;

एतादिसं दुच्चरितं चरित्वा, इधागता चिररत्ताय खादती’’ति.

महापेसकारपेतिवत्थु नवमं.