१०. खल्लाटियपेतिवत्थु

५८. ‘‘का नु अन्तोविमानस्मिं, तिट्ठन्ती नूपनिक्खमि;

उपनिक्खमस्सु भद्दे, पस्साम तं बहिट्ठित’’न्ति.

५९. ‘‘अट्टीयामि हरायामि, नग्गा निक्खमितुं बहि;

केसेहम्हि पटिच्छन्ना, पुञ्ञं मे अप्पकं कत’’न्ति.

६०. ‘‘हन्दुत्तरीयं ददामि ते, इदं दुस्सं निवासय;

इदं दुस्सं निवासेत्वा, एहि निक्खम सोभने;

उपनिक्खमस्सु भद्दे, पस्साम तं बहिट्ठित’’न्ति.

६१. ‘‘हत्थेन हत्थे ते दिन्नं, न मय्हं उपकप्पति;

एसेत्थुपासको सद्धो, सम्मासम्बुद्धसावको.

६२. ‘‘एतं अच्छादयित्वान, मम दक्खिणमादिस;

तथाहं [अथाहं (सी.)] सुखिता हेस्सं, सब्बकामसमिद्धिनी’’ति.

६३. तञ्च ते न्हापयित्वान, विलिम्पेत्वान वाणिजा;

वत्थेहच्छादयित्वान, तस्सा दक्खिणमादिसुं.

६४. समनन्तरानुद्दिट्ठे [समनन्तरा अनुद्दिट्ठे (स्या. क.)], विपाको उदपज्जथ [उपपज्जथ (सी. स्या.)];

भोजनच्छादनपानीयं [भोजनच्छादनं पानीयं (स्या. क.)], दक्खिणाय इदं फलं.

६५. ततो सुद्धा सुचिवसना, कासिकुत्तमधारिनी;

हसन्ती विमाना निक्खमि, ‘दक्खिणाय इदं फल’’’न्ति.

६६. ‘‘सुचित्तरूपं रुचिरं, विमानं ते पभासति;

देवते पुच्छिताचिक्ख, किस्स कम्मस्सिदं फल’’न्ति.

६७. ‘‘भिक्खुनो चरमानस्स, दोणिनिम्मज्जनिं अहं;

अदासिं उजुभूतस्स, विप्पसन्नेन चेतसा.

६८. ‘‘तस्स कम्मस्स कुसलस्स, विपाकं दीघमन्तरं;

अनुभोमि विमानस्मिं, तञ्च दानि परित्तकं.

६९. ‘‘उद्धं चतूहि मासेहि, कालंकिरिया [कालंकिरिया (क.)] भविस्सति;

एकन्तकटुकं घोरं, निरयं पपतिस्सहं.

७०. [म. नि. ३.२५०, २६७; अ. नि. ३.३६; पे. व. २४०, ६९३] ‘‘चतुक्कण्णं चतुद्वारं, विभत्तं भागसो मितं;

अयोपाकारपरियन्तं, अयसा पटिकुज्जितं.

७१. ‘‘तस्स अयोमया भूमि, जलिता तेजसा युता;

समन्ता योजनसतं, फरित्वा तिट्ठति सब्बदा.

७२. ‘‘तत्थाहं दीघमद्धानं, दुक्खं वेदिस्स वेदनं;

फलञ्च पापकम्मस्स, तस्मा सोचामहं भुस’’न्ति.

खल्लाटियपेतिवत्थु दसमं.