१२. उरगपेतवत्थु

८५. ‘‘उरगोव तचं जिण्णं, हित्वा गच्छति सन्तनुं;

एवं सरीरे निब्भोगे, पेते कालङ्कते सति.

८६. ‘‘डय्हमानो न जानाति, ञातीनं परिदेवितं;

तस्मा एतं न रोदामि, गतो सो तस्स या गति’’.

८७. ‘‘अनब्भितो [अनव्हितो (सी.)] ततो आगा, नानुञ्ञातो इतो गतो;

यथागतो तथा गतो, तत्थ का [का तत्थ (सी.)] परिदेवना.

८८. ‘‘डय्हमानो न जानाति, ञातीनं परिदेवितं;

तस्मा एतं न रोदामि, गतो सो तस्स या गति’’.

८९. ‘‘सचे रोदे किसा अस्सं, तत्थ मे किं फलं सिया;

ञातिमित्तसुहज्जानं, भिय्यो नो अरती सिया.

९०. ‘‘डय्हमानो न जानाति, ञातीनं परिदेवितं;

तस्मा एतं न रोदामि, गतो सो तस्स या गति’’.

९१. ‘‘यथापि दारको चन्दं, गच्छन्तमनुरोदति;

एवं सम्पदमेवेतं, यो पेतमनुसोचति.

९२. ‘‘डय्हमानो न जानाति, ञातीनं परिदेवितं;

तस्मा एतं न रोदामि, गतो सो तस्स या गति’’.

९३. ‘‘यथापि ब्रह्मे उदकुम्भो, भिन्नो अप्पटिसन्धियो;

एवं सम्पदमेवेतं, यो पेतमनुसोचति.

९४. ‘‘डय्हमानो न जानाति, ञातीनं परिदेवितं;

तस्मा एतं न रोदामि, गतो सो तस्स या गती’’ति.

उरगपेतवत्थु द्वादसमं.

उरगवग्गो पठमो निट्ठितो.